मध्य प्रदेशातील सागर शहरातील बसस्थानकावर एका महिलेला तीन जणांनी बेदम मारहाण केल्याची घटना उघडकीस आली आहे. संबंधित तिघांनी लाथा घालत काठीने मारहाण केली आहे. आरोपी एवढ्यावरच थांबले नाहीत, तर त्यांनी पीडित महिलेला फरपटत नेलं आहे. या घटनेचा व्हिडीओ समोर आला असून सोशल मीडियात व्हायरल झाला आहे.
हे प्रकरण उघडकीस आल्यानंतर, याप्रकरणी पोलिसांनी गुरुवारी तिघांना अटक केली आहे. पीडित महिला मानसिकदृष्ट्या विचलित होती, अशी माहिती एका वरिष्ठ पोलीस अधिकाऱ्याने दिली.
हेही वाचा- दहावीच्या विद्यार्थिनीनं अकराव्या मजल्यावरून मारली उडी, उच्चभ्रू सोसायटीतील घटना
संबंधित व्हिडीओत पीडित महिलेला फरपटत नेल्याच दिसत आहे. तसेच काठीने मारहाण केली जात आहे. तिचं पाच महिन्यांचं नवजात बाळ जमिनीवर पडलेलं असतानाही आरोपींनी तिच्या तोंडावर लाथा मारल्या. यावेळी पीडित महिला हात जोडून आरोपींकडून विनवणी करत आहे, तरीही आरोपी तिला मारहाण करताना व्हिडीओत दिसत आहेत.
हेही वाचा- संतापजनक: लेकानं जन्मदात्या आईला रस्त्यावरून नेलं फरपटत, हृदय पिळवटून टाकणारा VIDEO
याप्रकरणी प्रवीण रायकवार (२६), विक्की यादव (२०) आणि राकेश प्रजापती (४०) यांना गोपाळगंज पोलिसांनी गुरुवारी अटक केली. याबाबतची माहिती अतिरिक्त पोलीस अधीक्षक लोकेश सिन्हा यांनी दिली. प्राथमिक तपासानुसार, ही घटना १२-१३ ऑगस्टच्या मध्यरात्री घडली. यावेळी पीडित महिला बसस्थानकावरील कॅन्टीनमधून दूध घेण्यासाठी गेली होती. यावेळी काहीतरी घडलं आणि कॅन्टीनमधील तीन जणांनी तिला मारहाण केली, असं पोलिसांनी सांगितले. याबाबतचं वृत्त ‘इंडिया टुडे’नं दिलं आहे.
