शबरीमलाची परंपरा मोडणाऱ्या महिलेला सासूकडून मारहाण, रूग्णालयात दाखल

कनकदुर्गा मंगळवारी सकाळी पेरींतलमन्ना येथील तिच्या घरी परतली. त्यावेळी सासू आणि तिच्यामध्ये शबरीमला मंदिरात प्रवेश करण्यावरुन वाद झाला असे कुटुंबाच्या जवळ असलेल्या सूत्रांनी सांगितले. सासूने कनकदुर्गाच्या डोक्यावर प्रहार केला. कनकदुर्गा या हल्ल्यामध्ये जखमी झाली. तिला पेरींतलमन्ना येथील रुग्णालयात दाखल करण्यात आले असून तिची प्रकृती आता स्थिर असल्याची माहिती मिळत आहे.

सर्वोच्च न्यायालयाने मागच्यावर्षी १० ते ५० वयोगटातील महिलांना शबरीमला मंदिरात प्रवेश करण्यावर असलेली बंदी हटवली. पण त्यानंतरही मंदिर परिसरात मोठया प्रमाणावर सुरु असलेल्या विरोध प्रदर्शनामुळे १० ते ५० वयोगटातील महिलांना मंदिरात प्रवेश करता येत नव्हता. अनेक महिलांनी प्रवेश करण्याचा प्रयत्न केला पण त्यांना यश आले नाही. अखेर नववर्षाच्या दुसऱ्यादिवशी कनकदुर्गा आणि बिंदू या दोन महिलांनी शबरीमला मंदिरात प्रवेश करुन भगवान अय्याप्पांचे दर्शन घेतले. त्यांच्या दर्शनानंतर अपेक्षेप्रमाणे केरळमध्ये हिंसाचाराचा आगडोंब उसळला. महिला म्हणून आम्ही आमचा कायदेशीर हक्क बजावला असे कनकदुर्गाने इंडिया टुडेशी बोलताना सांगितले होते.