पीटीआय, लखनऊ सतरा दिवसांच्या अग्निपरीक्षेनंतर उत्तराखंडच्या सिलक्यारा बोगद्यातून सुटका करण्यात आलेल्या उत्तर प्रदेशच्या मजुरांची मुख्यमंत्री योगी आदित्यनाथ यांनी शुक्रवारी भेट घेतली.मुख्यमंत्र्यांच्या सरकारी निवासस्थानी झालेल्या या भेटीत योगींनी या मजुरांच्या प्रकृतीची व ख्यालीखुशालीची वैयक्तिकरीत्या चौकशी केल्याचे एका अधिकृत प्रवक्त्याने सांगितले. योगी आदित्यनाथ यांनी सर्व मजुरांना शाली व इतर भेटवस्तू दिल्या. या संपूर्ण कठीण काळात तुम्ही तुमची आशा व धैर्य कायम राखले आणि एकमेकांना धीरही दिला, असे ते या मजुरांना उद्देशून म्हणाले. तुम्ही नक्कीच बाहेर याल याची आम्हाला खात्री होती, असेही त्यांनी आवर्जून सांगितले.मुख्यमंत्र्यांना भेटणाऱ्यांमध्ये श्रावस्ती जिल्ह्यातील अंकित (२५), राम मिलन (३२), सत्यदेव (४४), संतोष (२४), जयप्रकाश (२२) व रामसुंदर (२६), लखीमपूर खेरी येथील मनजित (२२) आणि मिर्झापूर जिल्ह्यातील अखिलेश (३२) यांचा समावेश होता.
