मराठी अभिनेत्री अदिती सारंगधरसाठी आजचा दिवस फारच खास आहे. आजपासून दिवाळीला सुरूवात झाली हे तिच्या आनंदाचं एक कारण तर आहेच शिवाय तिचा आज वाढदिवसही आहे. दिवाळीच्या पहिल्याच दिवशी वाढदिवस आल्याने ती फारच आनंदी आहे. दिवसाची सुरूवात कामापासून करुन संध्याकाळी मराठी सिनेसृष्टीतील खास मित्र-मैत्रिणींसाठी तिने आपल्या घरी दिवाळी पार्टीचे आयोजन केले आहे. आपल्या या खास दिवाळीबद्दल सांगताना अदिती म्हणते की, मला जेवण करायला फार आवडतं. रोजच्या धकाधकीच्या जीवनातून मिळालेला तो निवांत वेळ असतो असं मला वाटतं. फक्त जेवण करायलाच नाही तर इतरांना जेवू घालायलाही मला फार आवडतं. आमच्याकडे प्रत्येक वर्षी दिवाळीची छोटेखानी पार्टी असते. माझा मुलगा अरिन पुढच्या महिन्यात एक वर्षाचा होईल. अरिनची ही पहिली दिवाळी आहे, त्यासाठीही आम्ही उत्साही आहोत. पण अरिन आधीही आम्हाला एक ८ वर्षांचा मुलगा आहे तो म्हणजे आमचा कुत्रा. तो आम्हाला अगदी मुलासारखाच आहे. ज्या घरात कुत्रा असतो ते घर सर्वार्थाने पूर्ण असतं असे म्हणतात. आमचं घर आमच्या याच मोठ्या मुलामुळे पूर्ण झालंय असं आम्हाला नक्कीच वाटतं. मला स्वतःला वेगवेगळे पदार्थ बनवायची आवड असल्यामुळे मी यंदा चिवडा, शंकरपाळ्या केल्यात. येत्या दिवसात लाडूही करणार आहोत. दिवाळी सेलिब्रेट करण्याचं म्हणाल तर आम्ही फटाके फोडणं केव्हाच बंद केलंय. दिवाळी सणाचा आनंद फक्त फटाके उडवूनच येतो असे नाही. याशिवायही असे अनेक पर्याय आहेत ज्यांनी तुम्ही कुटुंबाशी आणि मित्र- मैत्रिणींसोबत एकत्र येऊ शकता. आतापर्यंत दिवाळी साजरी करताना पहिल्या आंघोळीवेळी असणारी कडाक्याची थंडी आठवते. पण यावर्षी मात्र सगळ चक्रच उलटं झालेलं दिसतंय. थंडी तर सोडाच पण किमान ऊन तरी असेल का, असा प्रश्न पडतो. आता ऋतू असे काही उरलेच नाहीत. उन्हाची मनमानी करुन झाल्यावर आता पाऊसही त्याची मनमानी करत आहे. आता फक्त हिवाळा राहिला आहे, त्याचं काय होतंय हे थोड्याच दिवसात कळेल. पण ही दिवाळी सर्वांनाच नवीन काही देऊन जाईल अशी आशा मी करते. सर्वांनाच माझ्या परिवाराकडून दिवाळीच्या हार्दिक शुभेच्छा.
