Maharashtra Vidhan Sabha Election 2019 Big Leader Defeat : २०२४ च्या महाराष्ट्र विधानसभा निवडणुकीकडे संपूर्ण देशाचे लक्ष लागले होते. अखेर निवडणुकांचे बिगुल वाजले आहे. केंद्रीय निवडणूक आयोगाने महाराष्ट्र विधानसभा निवडणुकीची तारीख जाहीर केली आहे. येत्या २० नोव्हेंबर रोजी महाराष्ट्रातील विधानसभा निवडणूक पार पडणार असून २३ नोव्हेंबरला निवडणुकांचे निकाल घोषित होतील. यंदाच्या निवडणुकीत कोणता पक्ष सत्तेत येणार, कोणाच्या पदरात मुख्यमंत्री पद पडणार, हे पाहण्यास सर्व जण उत्सुक आहेत. महाविकास आघाडी आणि महायुतीमध्ये यंदा जोरदार लढत दिसून येईल. मागील विधानसभा निवडणुक २०१९ मध्ये पार पडली होती. त्यानंतरच्या पाच वर्षांत पक्ष, पदांसह सत्ताही बदलली आणि अनेक मोठे राजकीय बदल दिसून आले.
विधानसभा निवडणूक २०२४ मध्ये कोणाच्या पदरी अपयश येईल आणि कोणाला यश मिळेल, हे मतदारांच्या हाती आहे; पण तुम्हाला माहीत आहे का की, २०१९ च्या महाराष्ट्र विधानसभा निवडणुकीत काही मंत्र्यांचा दारुण पराभव झाला होता. एकूण ३७ मंत्र्यांपैकी नऊ मंत्र्यांना पराभवाला सामोरे जावे लागले. त्या नऊ मंत्र्यांमध्ये दोन कॅबिनेट मंत्री आणि सात राज्यमंत्र्यांचा समावेश होता. जाणून घेऊ त्याबद्दल सविस्तर… (9 Ministers who lost maharastra Assembly elections 2019)
पंकजा मुंडे (कॅबिनेट मंत्री, भाजपा)
२०१९ च्या निवडणुकीत सर्वांत मोठ्या पराभवाची नामुष्की ग्रामविकास आणि महिला व बालकल्याण मंत्री पंकजा मुंडे यांच्या पदरी आली होती. त्यांचा चुलतभाऊ राष्ट्रवादी काँग्रेसचे नेते धनंजय मुंडे यांनी परळीमध्ये ३० हजारपेक्षा अधिक मतांनी पंकजा मुंडे यांना हरवले होते. पंकजा मुंडे या भाजपाचे ज्येष्ठ नेते दिवंगत गोपीनाथ मुंडे यांचा वारसा पुढे चालवीत आहेत.
राम शिंदे (कॅबिनेट मंत्री, भाजपा)
१९९५ पासून भाजपाचा बालेकिल्ला असलेल्या कर्जत जामखेडमध्ये नगरचे पालकमंत्री, तसेच जलसंधारण मंत्री राम शिंदे यांना पराभव पत्करावा लागला. राष्ट्रवादीचे युवा नेते रोहित पवार यांनी ४३ हजारपेक्षा अधिक मतांनी शिंदे यांना हरवले.
संजय (बाळा) भेगडे (राज्यमंत्री, भाजपा)
विधानसभा निवडणूक २०१९ मध्ये मावळ विधानसभा मतदारसंघात राष्ट्रवादी काँग्रेसचे नेते सुनील शेळके यांनी इतिहास घडविला. राष्ट्रवादी काँग्रेसने २५ वर्षांचे भाजपाचे या मतदारसंघातील वर्चस्व जमीनदोस्त केले.भाजपा नेते व कामगार, पर्यावरण, मदत व पुनर्वसन, भूकंप पुनर्वसन संजय (बाळा) भेगडे यांचा ९५ हजार मतांनी दारुण पराभव झाला. प्रदीर्घ काळापासून भाजपाचे नेते असलेल्या शेळके यांनी ऐन निवडणुकीच्या आधी राष्ट्रवादीमध्ये प्रवेश केला होता.
विजय शिवतारे (राज्यमंत्री, शिवसेना)
पुणे जिल्ह्यातील पुरंदर येथील तीन वेळा शिवसेनेचे आमदार म्हणून निवडून आलेल्या जलसंपदा राज्यमंत्री विजय शिवतारे यांना २०१९ च्या विधानसभा निवडणुकीत काँग्रेस नेते संजय जगताप यांनी पराभूत केले.
अर्जुन खोतकर (राज्यमंत्री, शिवसेना)
२०१९ च्या विधानसभा निवडणुकीत वस्त्रोद्योग, पशुसंवर्धन, दुग्धविकास व मत्स्यव्यवसाय राज्यमंत्री शिवसेनेचे नेते अर्जुन खोतकर यांना जालना मतदारसंघातून काँग्रेस नेते कैलास गोरंट्याल यांनी सुमारे २० हजार मतांनी हरविले.
हेही वाचा : विधानसभा निवडणुकीआधी ‘एबी’ फॉर्मची चर्चा; एबी फॉर्म म्हणजे काय? निवडणुकीत या फॉर्मला इतके महत्त्व का?
अनिल बोंडे (राज्यमंत्री, भाजप)
२०१९ च्या निवडणुकीत अमरावतीमधील मोर्शी विधानसभा मतदारसंघात कृषिमंत्री भाजप नेते अनिल बोंडे यांचा स्वाभिमानी पक्षाचे नेते देवेंद्र भुयार यांनी हरविले होते.
जयदत्त क्षीरसागर (राज्यमंत्री, शिवसेना)
बीड विधानसभा मतदारसंघात २०१९ च्या निवडणुकीत रोजगार हमी व फलोत्पादन मंत्री शिवसेना नेते जयदत्त क्षीरसागर यांना त्यांचाच पुतण्या राष्ट्रवादीचे संदीप क्षीरसागर यांनी पराभूत केले होते. जयदत्त क्षीरसागर यांनी निवडणुकीपूर्वी आमदारकीचा राजीनामा देऊन राष्ट्रवादी काँग्रेस पक्षाला राम राम ठोकत थेट शिवसेनेत प्रवेश केला होता. त्यानंतर जूनमध्ये त्यावेळी मुख्यमंत्री असलेल्या देवेंद्र फडणवीस यांनी त्यांना मंत्रिपद दिले होते.
अंबरीश आत्राम (राज्यमंत्री, भाजप)
नक्षलग्रस्त भाग म्हणून ओळखल्या जाणाऱ्या गडचिरोली जिल्ह्यातील अहेरी विधानसभा मतदारसंघात राष्ट्रवादीचे धर्मरावबाबा आत्राम यांनी भाजपाचे राज्याचे आदिवासी विकास व वन राज्यमंत्री तथा गडचिरोलीचे पालकमंत्री अंबरीश आत्राम यांचा जवळपास १५ हजार मतांनी पराभव केला होता.
मदन येरावार (राज्यमंत्री, भाजपा)
यवतमाळ मतदारसंघामध्ये २०१९ च्या विधानसभा निवडणुकीत काँग्रेसचे अनिल ऊर्फ बाळासाहेब शंकरराव मांगूळकर हे आठ हजार मतांच्या फरकाने निवडून आले होते. या निवडणुकीत ऊर्जा, पर्यटन, अन्न व औषधी प्रशासन राज्यमंत्री मदन येरावार यांचा त्यांनी पराभव केला होता.
१५व्या महाराष्ट्र विधानसभेसाठी यंदा निवडणुका होत आहेत. महाराष्ट्रातील राष्ट्रवादी काँग्रेस व शिवसेना या प्रमुख पक्षांमध्ये फूट पडल्यानंतरची ही पहिलीच विधानसभा निवडणूक असेल. त्यामुळे या विधानसभा निवडणुकीकडे राज्यातीलच नव्हे, तर देशभरातील राजकीय विश्लेषकांचं लक्ष लागलेलं आहे. भारतीय जनता पक्ष, शिवसेना एकनाथ शिंदे गट व राष्ट्रवादी काँग्रेस अजित पवार गट यांची महायुती, तर दुसरीकडे शिवसेना उद्धव ठाकरे गट, राष्ट्रवादी काँग्रेस शरद पवार गट व काँग्रेस यांची महाविकास आघाडी या दोन प्रतिस्पर्ध्यांमध्ये प्रामुख्याने ही निवडणूक होईल.
