सध्या चित्रपट आणि त्यांची लांबी हा चांगलाच चर्चेचा विषय बनला आहे. नुकत्याच प्रदर्शित झालेल्या ‘अ‍ॅनिमल’ची लांबी ही ३ तास २१ मिनिटे होती. याबरोबरच कोविड काळात आलेला आणि बॉक्स ऑफिसवर सपशेल आपटलेला आमिर खानचा ‘लाल सिंह चड्ढा’सुद्धा तीन तासांचा होता. ऑस्करवारी करून येणारा राजामौली दिग्दर्शित ‘आरआरआर’देखील जवळपास तीन तासांचा होता. एकूणच सध्या मोठ्या चित्रपटांची क्रेझ पुन्हा पाहायला मिळत आहे. आधी ज्याप्रमाणे दीड ते अडीच तासात चित्रपट पूर्ण व्हायचा तसं न होता जुन्या चित्रपटांच्या लांबीचा ट्रेंड पुन्हा सुरू झाला आहे.
याआधीपण भारतात ‘लगान’, ‘मोहब्बतें’, ‘मेरा नाम जोकर’, ‘गँग्स ऑफ वासेपूर’सारखे मोठे चित्रपट प्रदर्शित झाले अन् चांगलेच गाजले. ‘एलओसी कारगिल’ हा चित्रपट तर तब्बल साडे चार तासांचा होता. पण तुम्हाला माहितीये की आजवरचा सर्वात मोठा चित्रपट कोणता आहे? हा चित्रपट तुम्हाला बघायचा असेल तर २-४ तास नव्हे तर तब्बल ३ दिवस तुम्हाला काढावे लागतील. हा नेमका चित्रपट आहे तरी कोणता तेच आपण आज जाणून घेणार आहोत.
आणखी वाचा : ६५ वर्षीय दर्शन जरीवालांवर महिलेचे गंभीर आरोप; अभिनेत्यासह विवाह केल्याचा अन् गरोदर असल्याचा खुलासा
‘द क्योर फॉर इंसोमनिया’ हा चित्रपटांच्या इतिहासातील सर्वात जास्त लांबीचा चित्रपट आहे. हा चित्रपट १९८७ मध्ये प्रदर्शित झाला होता. याच्या नावामुळेच या चित्रपटाचं नाव गिनीज बुक ऑफ वर्ल्ड रेकॉर्डमध्ये घेतलं जातं. या चित्रपटाचं दिग्दर्शन जॉन हेनरी टिमिस ४ यांनी केलं होतं. या चित्रपटाचा रन-टाइम ऐकून तुमचं डोकं चक्रावूनच जाईल. हा चित्रपट ५२२० मिनिटं मोठा होता. हा चित्रपट पूर्ण करायचं म्हंटलं तर जवळपास ३ दिवस अन् १५ मिनिटे तुमच्याकडे असणं आवश्यक आहे. असं नेमकं या चित्रपटात होतं तरी काय? याबद्दलच आपण माहिती घेऊया.
या चित्रपटाला कोणत्याही प्लॉट किंवा कथा नाही. यात फक्त एलडी ग्रोबन हे कलाकार त्यांची ४०८० पानांची कविता वाचन करताना पाहायला मिळतात. चित्रपटात काही ठिकाणी पोर्नोग्राफिक व्हिडीओ आणि हेवी मेटल म्युझिक आपल्याला आढळून येतं. ‘द क्योर फॉर इंसोमनिया’ हा चित्रपट सर्वप्रथम शिकागोच्या ‘स्कूल ऑफ द आर्ट इंस्टिट्यूट’मध्ये दाखवण्यात आला होता. ३१ जानेवारी १९८७ साली हा चित्रपट सुरू झाला अन् तो ३ फेब्रुवारीला संपला. हा चित्रपट तेव्हा सलग कोणताही ब्रेक न घेता दाखवण्यात आला होता.
असं म्हंटलं जातं की या चित्रपटाची कोणतीही कॉपी उपलब्ध नाही. शिवाय डीव्हीडी आणि व्हिडीओ फॉरमॅटमध्येही हा चित्रपट उपलब्ध नाही. या चित्रपटाच्या कॉपीज नेमक्या आहेत कुठे याचा कोणालाही पत्ता नाही. या सगळ्या कॉपीज हरवल्या गेल्या असल्याचं सांगितलं जातं. ज्यांना झोप न येण्याची समस्या आहे खासकरून त्यांच्यासाठी हा चित्रपट काढण्यात आला होता. यामुळेच चित्रपटाचं नावही त्याच आजाराशी संबंधित ठेवलं गेलं होतं.
