How To Apply For BH Series Number Plate Know Eligibility, Benefits, Fees :भारतात जेव्हा तुम्ही नवीन राज्यात किंवा शहरात जाता तेव्हा तुम्हाला अनेकदा नवीन ठिकाणी तुमचे वाहन पुन्हा नोंदणी करावे लागते, ही प्रक्रिया निश्चितच थोडी त्रासदायक असते. रस्ते वाहतूक आणि महामार्ग मंत्रालयाने (MoRTH) काही वर्षांपूर्वी ही प्रक्रिया सोपी करण्यासाठी एक उपाय शोधून काढला आहे. भारत सीरिज नंबर प्लेट्स, ज्यांना BH नंबर प्लेट्स असेही म्हणतात. ही नंबर प्लेट २०२१ मध्ये लाँच करण्यात आली, ज्यामुळे नोकरी, व्यवसायानिमित्त वारंवार एका राज्यांतून दुसऱ्या राज्यांत स्थलांतर करणाऱ्या व्यक्तींसाठी वाहन नोंदणी सुलभ झाले. पण, बीएच नंबर प्लेट्स म्हणजे काय, त्याचे फायदे, शुल्क, कागदपत्रं आणि कोण करू शकतं अर्ज? याविषयी तपशीलवार जाणून घेऊ.
BH नंबर प्लेटचा अर्थ काय आहे?
बीएच नंबर प्लेटमध्ये एक अद्वितीय नोंदणी क्रमांक असतो, जो संपूर्ण भारतातील एका वैयक्तिक वाहनाला दिला जातो. ही नंबर प्लेट अशा लोकांसाठी आहे, ज्यांना नोकरीनिमित्त एका राज्यातून दुसऱ्या राज्यात वारंवार प्रवास करावा लागतो. या नंबर प्लेटचे वैशिष्ट्य म्हणजे ते वाहन मालकाला एकाच नोंदणी क्रमांकाने एका राज्यातून दुसऱ्या राज्यात प्रवास करण्याची परवानगी मिळते. म्हणजेच, जर तुम्ही दुसऱ्या राज्यात स्थलांतरित झालात तर वाहनाची पुन्हा नोंदणी करण्याची आवश्यकता नाही, यामुळे वाहनमालकांना मोठ्या त्रासापासून वाचवता येईल. याशिवाय, विम्याच्या दृष्टिकोनातून बीएच नंबर प्लेट असणेदेखील सोयीस्कर आहे, कारण कार विम्यावर याचा परिणाम होत नाही.
बीएच नंबर प्लेटसाठी कोण अर्ज करू शकतो?
१) केंद्र आणि राज्य सरकारच्या विभागांचे कर्मचारी, जसे की लष्कर, नौदल आणि हवाई दलाचे कर्मचारी.
२) सार्वजनिक उपक्रम विभागाचे कर्मचारी किंवा संरक्षण कर्मचारी. लोकसभा आणि राज्यसभेचे सदस्य.
३) किमान चार राज्ये किंवा केंद्रशासित प्रदेशांमध्ये कार्यालये असलेल्या खाजगी क्षेत्रातील कंपन्यांचे कर्मचारी.
रस्ते वाहतूक आणि महामार्ग मंत्रालयाने (MoRTH) २०२१ मध्ये BH नंबर प्लेट लाँच केली होती. BH नंबर प्लेटचे स्वरूप असे आहे, ’24BH 2222XX’ असे ज्यात ’24’ नोंदणीचे वर्ष दर्शवते, ‘BH’ भारत मालिका, ‘2222’ नोंदणी क्रमांक आणि ‘XX’ वाहनाची श्रेणी दर्शवते.
बीएच सीरिज नंबर प्लेट्सची पात्रता काय आहे, खर्चात बचत
भारत सीरिज (BH) नंबर प्लेटचे अनेक फायदे आहेत. ही नंबर प्लेट संपूर्ण देशभर वैध आहे. म्हणजेच, बीएच सीरिज नंबर प्लेट असलेल्या वाहनमालकांना एका राज्यातून दुसऱ्या राज्यात जाताना वाहनाची पुन्हा नोंदणी करण्याची आवश्यकता नाही, यामुळे वेळ आणि पैसा वाचतो. बीएच सीरिज नंबर प्लेटमुळे कागदपत्रांचा त्रास कमी होतो. जर एखादे वाहन चोरीला गेले किंवा अपघात झाला तर बीएच सीरिज नंबर प्लेटमुळे अधिकाऱ्यांना वाहनमालकाची ओळख पटवणे सोपे होते. बीएच सीरिज नंबर प्लेट असलेल्या वाहनमालकांना एकाच वेळी २४ महिन्यांचा रोड टॅक्स भरावा लागतो. जर तुम्ही दोन वर्षांनंतर कर भरण्यास विसरलात तर तुम्हाला दररोज १०० रुपये दंड भरावा लागेल.
बीएच सीरिज नंबर प्लेटसाठी अर्ज कसा करावा
१) भारत सीरिज (BH) नंबर प्लेटसाठी अर्ज करण्यासाठी, तुम्ही रस्ते वाहतूक आणि महामार्ग मंत्रालयाच्या (MoRTH) वाहन पोर्टलवर जा.
२) पोर्टलवर लॉग इन करा.
३) Vehicle Registration टॅबवर क्लिक करा.
४) तुमचे राज्य किंवा केंद्रशासित प्रदेश निवडा.
५) Apply For New Registration टॅबवर क्लिक करा.
६) ड्रॉपडाउन मेनूमधून Bharat Series निवडा.
७) तुमचे नाव, पत्ता, वाहन मॉडेल, चेसिस, इंजिन इत्यादी वाहन तपशील अपलोड करा.
८) ओळखपत्र आणि पत्ता पुराव्यासाठी आवश्यक कागदपत्रे अपलोड करा.
९) रजिस्ट्रेशन फी जमा करा.
१०) फी जमा केल्यानंतर एक कन्फर्मेशन स्लिप मिळेल, ज्यात युनिक अॅप्लिकेशन नंबर असेल.
११) अर्ज भरताना सीरिज प्रकारातील BH पर्याय निवडा.
१२) वर्किंग सर्टिफिकेट (फॉर्म ६०) किंवा अधिकृत आयडीची प्रत सादर करा.
१३) प्रादेशिक परिवहन कार्यालय (RTO) कडून BH सीरिजसाठी मंजुरी मिळवा.
१४) प्रक्रिया पूर्ण झाल्यानंतर, वाहन पोर्टल भारतातील सर्व राज्यांमध्ये जारी केलेल्या रेंडम नंबरमध्ये BH सीरिज रजिस्ट्रेशन नंबर जनरेट होईल.
