कोकण हापूस आणि कर्नाटकी आंब्यातला फरक कसा ओळखावा? फसवणूक टाळण्यासाठी फरक ओळखायची सोपी ट्रिक

अक्षयतृतीयेच्या दिवशी बाजारात आंब्याची मागणी वाढते. हाच मुहूर्त साधून बाजारात हापूस आंब्यांची आवकदेखील वाढते. सणासाठी तयार आंबा खायला मिळावा यासाठी घरगुती ग्राहकांसह विक्रेत्यांकडून मोठी मागणी असते.कर्नाटकी हापूसचा रंग, आकार रत्नागिरी हापूसशी मिळताजुळता असल्याने ग्राहकांची फसवणूक होते. अनेकदा विक्रेता कर्नाटकी हापूसचा भाव कमी करुन ग्राहकांना देतात. कर्नाटकी आंबा दिसायला हापूससारखा असला, तरी त्याला कोकणी हापूसची चव नसते. त्यामुळं घरी गेल्यानंतर आपली फसवणूक झाल्याचे ग्राहकांच्या लक्षात येते. त्यामुळं रत्नागिरी हापूस आणि कर्नाटकी हापूस या पद्धतीने ओळखा.

हापूस आंबा घेताना तो कधीही नुसता वरवर बघून खरेदी करू नका. कारण दिसायला कोकणातला हापूस आणि कर्नाटकी हापूस हे दोन्हीही सारखेच दिसतात. त्यामुळे नेहमी चव घेऊन, आंबा चिरूनच तो खरेदी करा.

कोकणातला हापूस आंबा हा आतून केशरी रंगाचा असतो. तर कर्नाटक- केरळचा हापूस हा पिवळसर रंगाचा असतो.कर्नाटकी हापूस हा आकाराने उभट असतो आणि त्याची साल जाड असते. देठाचा भाग हिरव्या रंगाचा असतो. टोकाकडे पिवळसर असतो.

कोकणातल्या हापूसची साल पातळ असते, तर कर्नाटकी हापूसची साल जाडसर असते.

कोकणातला हापूस हा अतिशय सुगंधी आणि गोड असतो. तर कर्नाटकी हापूसचा सुगंध अगदी कमी असतो. शिवाय तो सपक लागतो.

त्यामुळे आता आंबा खरेदी करताना वरील सगळ्या टीप्स लक्षात ठेवा आणि मगच आंबे खरेदी करा.