PAN Card: पॅन कार्ड धारकांसाठी महत्त्वाची बातमी आहे. सरकारने प्रत्येक भारतीय नागरिकाला आधार कार्ड आणि पॅन कार्ड लिंक करणे बंधनकारक केले आहे. सरकारने यापूर्वीच पॅन कार्ड लिंक करण्यास सांगितले होते. आधार पॅन कार्डला लिंक करण्याची शेवटची तारीख ३१ मार्च २०२३ आहे. गेल्या काही महिन्यांपासून पॅन आधारला लिंक करण्यासाठी आयकर विभागाने सूचना दिल्या होत्या. आता लिंक प्रक्रियेसाठी पुन्हा मुदतवाढ देण्यास आयकर विभागाने नकार दिला आहे. त्यामुळे तुम्ही अजूनही पॅन कार्ड लिंक केले नसेल तर तुमचे पॅन कार्ड बाद करण्यात येईल. असे झाल्यास तुम्हाला आर्थिक व्यवहार करताना अडचणी येऊ शकतील. त्यामुळे आजच तुमचे पॅन कार्ड लिंक करा.
आयकर विभागाने केले ट्वीट
आयकर विभागाने ट्वीट करत पॅनशी आधार लिंक न केलेल्या नागरिकांना इशारा दिला आहे. आयकर कायदा १९६१ नुसार सर्व पॅन धारकांसाठी ३१ मार्च २०२३ ही तारीख पॅन आधार लिंक करण्याची शेवटची तारीख आहे. जर पॅन आधारशी लिंक केले नसेल तर तुमचे पॅनकार्ड बाद होणार असे या ट्वीटमध्ये नमूद केलेले आहे.
(आणखी वाचा : तुमच्या आधार कार्डवर किती सिमकार्डची नोंद आहे? ‘या’ सोप्या स्टेप्स वापरून लगेच जाणून घ्या )
सेंट्रल बोर्ड ऑफ डायरेक्ट टॅक्सेसने ३० जूनपासून आधार पॅनशी लिंक करण्यासाठी १ हजार रुपये दंड आकारला होता. दंड भरल्याशिवाय कोणीही पॅन आधारला लिंक करू शकणार नाही. ३१ मार्च २०२३ पर्यंत आधार पॅन लिंक प्रक्रिया सुरू राहिल त्यानंतर मुदतवाढ दिली जाणार नाही असे आयकर विभागाने स्पष्ट केले आहे.
ज्या नागरिकांचे पॅन कार्ड ३१ मार्च २०२३ पर्यंत लिंक केले जाणार नाही असे सर्व पॅन कार्ड निष्क्रिय करण्यात येतील असे स्पष्ट करण्यात आले आहे. याशिवाय तुम्ही तुमचे बंद पॅन कार्ड कागदपत्र म्हणून कुठेही वापरत असाल तर तुम्हाला दंडही होऊ शकतो. आयकर कायदा १९६१ च्या कलम २७२B अंतर्गत तुम्हाला १० हजारांपर्यंत दंड देखील भरावा लागू शकतो असे आयकर विभागाने स्पष्ट केले आहे.
पॅन कार्ड आधार कार्डशी लिंक करण्याची प्रक्रिया अगदी सोपी आहे. यामध्ये तुम्हाला कोणत्याही प्रकारच्या अडचणींचा सामना करावा लागणार नाही. यासाठी तुम्हाला http://www.incometax.gov.in या वेबसाइटला भेट द्यावी लागेल. येथे जाऊन तुम्ही तुमचे पॅन कार्ड आधार कार्डशी लिंक करू शकता.
