‘हा’ आहे देशातील सर्वांत लहान रेल्वे प्रवास, प्रवासासाठी लागतात फक्त नऊ मिनिटे; पण तिकीट भाडे ऐकून बसेल धक्का

त्यासाठी अनेक नव्या ट्रेन सुरू केल्या जातात; पण या गाड्यांचे भाडे त्यांच्या सुविधांवर अवलंबून असते. जर एखादी ट्रेन जास्त अंतर कापत असेल, तर तिचं भाडं जास्त असतं. अंतरानुसार हे भाडे वाढते. पण तुम्हाला माहितेय का भारतात असा एक रेल्वेमार्ग आहे, ज्यावर फक्त तीन किलोमीटरच्या प्रवासासाठी प्रवाशांकडून तब्बल १२५५ रुपये भाडं आकारलं जातं. तुमचा कदाचित यावर विश्वास बसणार नाही; पण हे पूर्णत: सत्य आहे.

ट्रेनची तिकिटं मिळविण्यासाठी करावी लागते प्रतीक्षा

फक्त नऊ मिनिटांच्या या रेल्वे प्रवासाचे भाडं खूपच जास्त आहे. पण, आश्चर्याची गोष्ट म्हणजे यानंतरही या मार्गावरील ट्रेनची तिकिटं मिळविण्यासाठी बरीच प्रतीक्षा करावी लागते.

याहून विशेष म्हणजे हा सर्वांत लहान रेल्वे प्रवास महाराष्ट्रातील एका भागात सुरू आहे. होय, आपण महाराष्ट्रातील नागपूर ते अजनी या स्थानकादरम्यान धावणाऱ्या ट्रेनबद्दल बोलत आहोत. या मार्गावर अनेक गाड्या धावतात. दोन्ही स्थानकांमधील अंतर फक्त तीन किलोमीटर आहे, जे पार करण्यासाठी नऊ मिनिटांचा कालावधी लागतो.

ट्रेन दोन्ही स्थानकांवर दोन मिनिटं थांबते. या दोन्ही स्थानकांदरम्यान बुकिंगसाठी प्रतीक्षा यादी दिसते. या मार्गावर अनेक गाड्या धावत असूनही प्रतीक्षा यादी पाहून लोकही आश्चर्यचकित होत आहेत.

यात चकित करणारी गोष्ट म्हणजे या मार्गावरून धावणाऱ्या रेल्वेगाडीच्या तिकिटासाठी प्रवाशांना अंतराच्या तुलनेत मोठी रक्कम मोजावी लागते. बरेच लोक त्यांच्या कार्यालयात येण्या-जाण्यासाठीही या रेल्वेमार्गाचा वापर करतात. या मार्गावरून धावणाऱ्या अनेक गाड्यांपैकी एक असलेल्या विदर्भ एक्स्प्रेसच्या प्रथम वर्गाच्या तिकिटासाठी तुम्हाला १२५५ रुपये मोजावे लागतात. लोक त्यांच्या सोईनुसार तिकिटांचे आरक्षण करतात. काही लोक ज्यांना दररोज प्रवास करावा लागतो, ते सामान्य दर्जाच्या तिकिटावरही प्रवास करतात.