रस्त्यावरून किंवा महामार्गावरून प्रवास करताना आजूबाजूच्या झाडांच्या खोडांना पांढरा रंग दिल्याचे तुम्ही अनेकदा पाहिले असेल. पण हा रंग देण्यामागचे कारण तुम्हाला माहीत आहे का? नाही ना… त्यामुळे झाडांच्या खोडांना पांढऱ्या रंगाने रंगवण्याचे कारण काय आहे जाणून घेऊ…
मार्ग नीट दिसतो
खरंतर झाडांना पांढरा रंग देण्यामागचा मुख्य उद्देश रस्त्यावरून रात्रीने गाडीने प्रवास चालकाला सतर्क करणे. रात्रीच्या वेळी झाडांना दिलेला पांढरा रंग हा दूर लगेच दिसतो, त्यामुळे मार्ग दिसणे सोपे जाते. हायवेवरील झाडांना पांढरा रंग यासाठी दिला जातो जेणेकरून रात्रीच्या वेळी झाडे नजर यावीत.
किटकांपासून संरक्षण होते
झाडांना लावलेला पांढरा रंग म्हणजे चुना असतो. चुन्याने झाडांना रंग दिला जातो ज्यामुळे झाडावर किटक, किडे आणि बुरशीचा धोका कमी होतो. चुना झाडांच्या मुळाशी जाऊन झाडांवरील कीटकांचा नाश करतो, त्यामुळे झाडाची मुळे कमकुवत होत नाहीत. याशिवाय रंगामुळे खोडाच्या साली, भेगा आणि फटी भरल्या जातात त्यामुळे कीटकांना वाढीस जागा मिळत नाही.
सूर्यप्रकाशापासून संरक्षण होते
अनेकदा तुम्ही पाहिलं असेल झाडांच्या खोडांना तडे जाऊ लागतात. त्यामुळे त्यांची साल ही खोडापासून वेगळी होऊ लागते. पण झाडांना पांढरा रंग दिल्याने सूर्यकिरणांचा त्यांच्यावर फारसा परिणाम होत नाही, त्यामुळे झाडं निरोगी राहते.
काही संरक्षित भागांमध्ये झाडांना लावलेला पांढरा रंग हे दर्शवतो की, ही झाडे वन विभागाच्या अखत्यारीत आहेत.
