कर्नाटक विधानसभा निवडणुकीसाठी १० मे रोजी मतदान पार पडणार आहे. तर, १३ मे रोजी निकाल हाती येतील. त्यापार्श्वभूमीवर काँग्रेस आणि भाजपात आरोप-प्रत्यारोपांच्या फैरी झडत आहेत. काँग्रेसकडून कर्नाटकातील भाजपा सरकारवर ४० टक्के कमिशन घेतल्याचा सातत्याने आरोप करण्यात येत आहे. याला आता पंतप्रधान नरेंद्र मोदी यांनी प्रत्युत्तर दिलं आहे. काँग्रेसच्या राजवटीत ८५ टक्के कमिशन घेतलं जात होतं, असं पंतप्रधान मोदींनी म्हटलं आहे.
कोलार येथे प्रचार सभेला संबोधित करताना पंतप्रधान मोदींनी म्हटलं, “८५ टक्के कमिशन हीच काँग्रेसची ओळख आहे. काँग्रेसच्या राजवटीत त्यांचे नेते आणि तत्कालीन पंतप्रधान सांगायचे की, केंद्र सरकारने १ रुपया पाठवला तर, लोकांपर्यंत केवळ १५ पैसे पोहचत होते.”
हेही वाचा : Karnataka Election: “…तर मला विषारी साप बनणं मंजूर”, पंतप्रधान मोदी यांचं विधान!
“यासारखा पक्ष कधीही राज्याचा विकास करू शकत नाही. भाजपाच्या राजवटीत १०० टक्के पैसा गरिबांपर्यंत पोहचतो,” असेही पंतप्रधानांनी सांगितलं.
गांधी कुटुंबावर अप्रत्यक्षपणे टीका करत पंतप्रधान मोदी म्हणाले, “हजारो कोटी रुपयांची अफरातफर केल्याप्रकरणी काँग्रेसचं ‘शाही’ कुटुंब आणि त्यांचे सहकारी जामिनावर आहेत. पक्षाचे मुख्य नेतेच भ्रष्टाचारात गुंतलेले आहेत. त्यामुळे काँग्रेस भ्रष्टाचारविरोधी असू शकत नाही. फक्त भाजपाच भ्रष्टाचाऱ्यांवर कारवाई करू शकते.”
“भ्रष्टाचाराविरुद्ध सुरू असलेल्या लढाईमुळे काँग्रेसमध्ये अस्वस्थता परसली आहे. त्यामुळे माझा द्वेष करत व्यक्तीगत हल्ले करण्यात येत आहेत,” असे पंतप्रधान मोदींनी सांगितलं.