Jammu and Kashmir Assembly Election Result 2024 : मोदींनी सर्वांत प्रथम सभा घेतलेल्या जागेवर आपची मुसंडी; भाजपा उमेदवाराचा पराभव करून जम्मूत उघडलं खातं!

पंतप्रधान नरेंद्र मोदी हे जम्मू काश्मीरच्या निवडणुकीसाठीचे (J & K Elections) भाजपाचे स्टार प्रचारक होते. १४ सप्टेंबर रोजी दोडा या ठिकाणी असलेल्या मैदानावर मोदींनी सभा घेतली. जम्मू काश्मीरची निवडणूक (J & K Elections) जाहीर झाल्यानंतर पंतप्रधान नरेंद्र मोदी यांची ही पहिली सभा होती. परंतु, त्याच जागेवर भाजपाचा पराभव झाला आहे. एवढंच नव्हे तर गेल्या ४० वर्षांत या ठिकाणी भेट देणारे ते एकमेव पंतप्रधान ठरले होते. तरीही त्यांचा या मतदारसंघावर करिष्मा चालला नाही.

हेही वाचा >> Jammu and Kashmir Assembly Election Result 2024 Live : इंडिया आघाडी बहुमताच्या जवळ; फारुख अब्दुल्ला यांनी जाहीर केलं मुख्यमंत्र्याचं नाव

निवडणूक आयोगाच्या संकेतस्थळानुसार दुपारी २ वाजता मेहराज मलिक चार हजार ७७० मतांनी पुढे होते. जम्मू काश्मीरमध्ये आपला संधी मिळणं ही आश्चर्याची गोष्ट मानली जातेय. कारण हरियाणासारख्या राज्यात आपची पिछेहाट झालेली आहे.

डोडामधून आम आदमी पक्षाचे उमेदवार मेहराज मलिक यांनी भाजपाच्या उमेदवाराला हरवून शानदार यश मिळवलं आहे. त्यासाठी त्यांचे खूप खूप अभिनंदन. तुम्ही खूच चांगल्या प्रकारे निवडणूक लढलात. आपने पाचव्या राज्यात आमदार जिंकवल्याने पक्षाचेही आभार, असं आपचे सर्वेसर्वा अरविंद केजरीवाल यांनी म्हटलंय.

मेहराज मलिक होते सतत चर्चेत

आपने २०२२ मध्ये डोडामध्ये भव्य रॅली काढली होती. तेव्हापासून आप तिथे सक्रिय आहे. तर, मलिक हे डोडा जिल्हा विभाग परिषदेचे सदस्य असून स्थानिक प्रशासनाविरोधात आक्रमक भूमिका घेण्यावरून ते सतत चर्चेत होते. रस्ता रोको करणे, अधिकाऱ्यांना कार्यालयात डांबून ठेवणे आदी प्रकरणांमुळे त्यांच्यावर अनेक प्रकारचे गुन्हे दाखल आहेत.