Chhattisgarh Vidhan Sabha Election Result 2023 Updates, 3 December 2023: छत्तीसगड राज्यातील विधानसभा निवडणुकीकडे समस्त देशाचे लक्ष लागले आहे. या राज्यात काँग्रेस आपली सत्ता कायम राखण्यात यशस्वी होईल की भाजपा पुन्हा एकदा मुसंडी मारेल, याची उत्सुकता सर्वांनाच लागली आहे. छत्तीसगडमधील ९० जागांसाठी दोन टप्प्यात मतदान पार पडलं. ७ नोव्हेंबर रोजी येथे पहिल्या टप्यातील मतदान पार झालं; तर दुसऱ्या टप्प्यातील मतदान १७ नोव्हेंबर रोजी पार पडलं. छत्तीसगडमधील ९० जागांवर लढणाऱ्या हजारो उमेदवारांचं भवितव्य मतपेटीत कैद झालं आहे. यावर आज (३ डिसेंबर) मतमोजणी होणार असून जनतेनं कोणत्या उमेदवाराला कौल दिला? हे पुढील काही तासांत स्पष्ट होणार आहेत. या निवडणूक निकालासह याबाबतच्या प्रत्येक घडामोडींचे लाईव्ह अपडेट्स…
Chhattisgarh Assembly Election Result 2023 Updates: छत्तीसगड विधानसभा निवडणूक निकालाबाबतच्या महत्त्वाच्या घडामोडी
भाजपाचा ४६ हून अधिक जागांवर विजय होत स्पष्ट बहुमत मिळालं आहे. त्यामुळे भाजपाचं सरकार स्थापन करण्याचा मार्ग मोकळा झाला आहे.
अधिकृत आकडेवारीनुसार, छत्तीसगडमध्ये भाजपाने १८ जागांवर विजय संपादन केला आहे. तर ३६ जागांवर आघाडी घेतली आहे. तर काँग्रेसने १० जागांवर विजय संपादन केलं असून २६ जागांवर आघाडी घेतली आहे. ६२ जागांवर अद्याप मतमोजणी सुरू आहे...
छत्तीसगडमध्ये एकूण ७६.३ टक्के मतदान झालं. यातील १.२९ टक्के मतदारांनी NOTA बटण दाबलं.
भाजपाच्या अनेक मोठे नेते आणि पदाधिकाऱ्यांकडून प्रतिक्रिया येऊ लागल्या आहेत. या दरम्यान, देशाचे पंतप्रधान नरेंद्र मोदी यांनीही भाजपाच्या यशाबाबत एक्सवर पोस्ट केली आहे. पोस्टमधून त्यांनी राज्यातील जनतेचे आणि भाजपा नेत्यांचे आभार मानले आहेत.
छत्तीसगड विधानसभा निवडणुकीच्या मतमोजणीत भाजपाने बहुमताचा आकडा पार केला असून ५६ जागांवर आघाडी घेतली आहे. तर सत्ताधारी काँग्रेसला केवळ ३२ जागांवर आघाडी घेता आली. याव्यतिरिक्त बीएसपीने दोन जागांवर आघाडी घेतली आहे. मतमोजणी अंतिम टप्प्यात आली असून भाजपाने छत्तीसगडमध्ये विजय जवळपास निश्चित केला आहे.
छत्तीसगडमधील भूपेश बघेल यांच्या नेतृत्वाखालील काँग्रेस सरकारमधील १३ पैकी नऊ मंत्री पिछाडीवर आहेत. या नेत्यांनी मतमोजणीच्या सुरुवातीला आघाडी घेतली होती. मात्र त्यानंतर हे नऊ मंत्री पिछाडीवर पडले आहेत. अद्याप येथील मतमोजणी सुरू असून निकाल जाहीर व्हायचा आहे.
नऊ मंत्र्यांमध्ये उपमुख्यमंत्री टीएस सिंह देव, गृहमंत्री ताम्रध्वज साहू यांचा समावेश आहे. हे दोघेही छत्तीसगडमधील काँग्रेसचे प्रमुख नेते आहेत. जे २०१८ च्या निवडणुकीत काँग्रेसच्या जबरदस्त विजयानंतर मुख्यमंत्रीपदाचे प्रबळ दावेदार होते. राज्य युनिटचे प्रमुख दीपक बैज हेही पिछाडीवर आहेत.
माजी सीआरपीएफ जवान रामकुमार टोप्पो हे सीतापूर मतदारसंघातून मंत्री अमरजीत भगत यांच्या विरोधात ३२६२ मतांनी आघाडीवर आहेत. १८ पैकी चार फेऱ्यांची मतमोजणी संपली आहे. सीतापूर ही जागा २००३ पासून काँग्रेसने कधीही गमावलेली नाही.
छत्तीसगडचे विद्यमान मुख्यमंत्री भूपेश बघेल पाटण मतदारसंघात ४२६२ मतांनी आघाडीवर आहेत.
छत्तीसगड भाजपा निवडणूक प्रभारी ओम माथर आणि सहप्रभारी मंत्री मनसुख मांडविया दुपारी दिल्लीहून रायपूरला रवाना होणार आहेत.
उपमुख्यमंत्री, काँग्रेस नेते टीएस सिंगदेव है चौथ्या फेरीनंतर अंबिकापूर मतदारसंघातून १६२३ मतांनी पिछाडीवर आहेत. सिंगदेव यांना १८,२४० मते मिळाली आहेत.
छत्तीसगड विधानसभा निवडणुकीच्या मतमोजणीत सुरुवातीच्या काही फेऱ्यांमध्ये काँग्रेसने जोरदार मुसंडी मारली होती. त्यामुळे तिथे काँग्रेसचं सरकार येण्याची शक्यता निर्माण झाली होती. पण त्यानंतर छत्तीसगडमध्ये फासे पालटल्याचं चित्र आहे. सध्याच्या घडीला भाजपाने ५४ जागांवर आघाडी घेतली आहे. तर काँग्रेस ३४ जागांवर पुढे आहे. या व्यतिरिक्त इतर पक्षाचा एक उमेदवार आघाडीवर आहे.
छत्तीसगड विधानसभा निवडणुकीची मतमोजणी सुरू आहे. सुरुवातीच्या काही फेऱ्यामध्ये काँग्रेसने जोरदार मुसंडी मारल्याचं चित्र होतं. पण आता मतांचा कल काही प्रमाणात भाजपाच्या बाजूने झुकताना दिसत आहे. यावर आता छत्तीसगडचे माजी मुख्यमंत्री आणि भाजपाचे वरिष्ठ नेते रमण सिंह यांनी प्रतिक्रिया दिली आहे.
छत्तीसगडमध्ये काँग्रेस आणि भाजपामध्ये अटीतटीची लढत पाहायला मिळत आहे. दर मिनिटाला निकालाचा कौल एका पक्षाकडून दुसऱ्या पक्षाकडे झुकताना दिसत आहे. सध्याच्या घडीला काँग्रेस ४७ जागांवर आघाडीवर आहे. तर ४२ जागांवर भाजपा पुढे आहे. ९० पैकी एका जागेवर अपक्ष आमदार आघाडीवर असल्याचं दिसत आहे.
छत्तीसगडमध्ये काँग्रेसने ५७ जागांवर आघाडी घेतली आहे. तर भाजपा ३३ जागांवर पुढे आहे. अनेक मतदारसंघात चुरसीची लढत पाहायला मिळत आहे. पण छत्तीसगडमध्ये काँग्रेस सत्ता राखण्याची शक्यता वर्तवली जात आहे.
सुरुवातीच्या कलनुसार, छत्तीसगडमध्ये सध्या काँग्रेसने जोरदार मुसंडी मारली असून भाजपाला धोबीपछाड दिल्याचं दिसत आहे. आताच्या घडीला काँग्रेस ४८ जागांवर आघाडीवर आहे. तर भाजपा ३२ जागांवर आघाडी घेतली आहे.
"आम्ही ७५ हून अधिक जागा जिंकू आणि राज्यात सरकार बनवू"- छत्तीसगडचे मंत्री आणि काँग्रेस नेते ताम्रध्वज साहू
छत्तीसगडमध्ये ८ जागांवर काँग्रेसने आघाडी घेतली आहे. तर भाजपा ६ जागांवर आघाडीवर आहे. त्यामुळे इथे अटीतटीची चुरस पाहायला मिळत आहे.
-रमण सिंग (तीन वेळा मुख्यमंत्री राहिलेले भाजपाचे प्रमुख नेते)
-विजय बघेल, विद्यमान मुख्यमंत्री भूपेश बघेल यांचे नातेवाईक
-भाजपाचा विजय झाल्यास अरुण साओ हे संभाव्य मुख्यमंत्रिपदाचे उमेदवार मानले जात आहेत.
-केदार कश्यप (भाजपाचे ज्येष्ठ नेते दिवंगत बळीराम कश्यप यांचे पुत्र. ते बस्तरमधून चार वेळा आमदार आणि चार वेळा लोकसभा खासदार होते.)
- चार वेळा मंत्री राहिलेले बृजमोहन अग्रवाल
- केंद्रीय राज्यमंत्री रेणुका सिंह
भूपेश बघेल, मुख्यमंत्री
टी एस सिंग देव, उपमुख्यमंत्री
चरणदास महंत, विधानसभा अध्यक्ष
ताम्रध्वज साहू, गृहमंत्री
दीपक बैज, खासदार आणि सीपीसीसी प्रमुख
छत्तीसगड विधानसभा निवडणुकीच्या मतमोजणीपूर्वी मतमोजणी अधिकाऱ्यांच्या उपस्थितीत सुरगुजा येथील स्ट्राँग रूमचे कुलूप उघडलं आहे. सकाळी ८ वाजता मतमोजणीला सुरुवात होणार आहे.
"छत्तीसगडमध्ये भाजपा स्पष्ट बहुमताने सरकार बनवेल. आम्ही राज्यात ४२ ते ५५ जागा जिंकू"- भाजपा नेते आणि माजी मुख्यमंत्री रमण सिंह
थोड्याच वेळात विधानसभा निवडणुकीची मतमोजणी सुरू होणार असल्याने अंबिकापूर येथील मतमोजणी केंद्रावर सुरक्षा वाढवण्यात आली आहे.
छत्तीसगडचे विद्यमान मुख्यमंंत्री भूपेश बघेल हे दुर्ग जिल्ह्यातील पाटण या मतदारसंघातून निवडणूक लढवत आहेत. बघेल हे एक प्रबळ उमेदवार आहेत. मात्र, या जागेसाठी भाजपाने बघेल यांचे नातेवाईक विजय बघेल यांना उमेदवारी दिलेली आहे. विजय बघेल हे सध्या दुर्ग या लोकसभा मतदारसंघाचे खासदार आहेत. छत्तीसगडचे पहिले मुख्यमंत्री अजित जोगी यांचे पुत्र तथा जनता काँग्रेस छत्तीसगड पक्षाचे अध्यक्ष अमित जोगी हेदेखील पाटण या मतदारसंघातूनच निवडणूक लढवत आहेत. त्यामुळे या जागेवर कोण बाजी मारणार? याची सर्वांनाच उत्सुकता लागली आहे.
रायपूर येथील मतमोजणी केंद्रावर मतमोजणीची तयारी सुरू झाली आहे. येथे लवकरच विधानसभा निवडणुकीची मतमोजणी सुरू होणार आहे. मतमोजणी केंद्रावर सुरक्षा दलांच्या जवानांना तैनात केलं आहे.
काँग्रेस पक्ष हा घाबरलेला आणि बिथरलेला पक्ष आहे. छत्तीसगडमध्ये काँग्रेस हरणार आहे, त्यामुळे ते कधी EVM ला दोष देते तर कधी संविधानाला दोष देते. काँग्रेस पक्ष निवडणुकीत हरणार आहे. छत्तीसगडच्या जनतेने त्यांना नाकारले आहे. - छत्तीसगड भाजपाचे प्रदेशाध्यक्ष अरुण साओ
छत्तीसगडच्या विधानसभा निवडणुकीत आम आदमी पार्टी (आप), जनता काँग्रेस छत्तीसगड आणि बहुजन समाज पार्टी (बीएसपी) अशा पक्षांनीदेखील उडी घेतलेली आहे. त्यामुळे याचे निवडणूक निकालावर काय परिणाम होणार? याकडे सर्वांचं लक्ष आहे.
विविध संस्थानी छत्तीसगडच्या एग्झिट पोलचा दिलेला अंदाज
छत्तीसगड विधानसभा निवडणूक निकालासंदर्भातल्या महत्त्वाच्या घडामोडींचा एकत्रित आढावा
