Chinchwad Assembly Constituency : महाराष्ट्रात विधानसभेची निवडणूक जाहीर झाली आहे. त्यामुळे राजकीय घडामोडींना वेग आला आहे. राज्यातील सर्वच दिग्गज नेत्यांनी मतदारसंघात पुन्हा एकदा आपलं वर्चस्व टिकवून ठेवण्यासाठी कंबर कसली आहे. अनेक नेत्यांचे मतदारसंघातील दौरे वाढले आहेत, तर सर्वच राजकीय पक्षांकडून कामाचा आढावा घेतला जात आहे. खरं तर २०२४ ची विधानसभा निवडणूक अनेक नेत्यांसाठी प्रतिष्ठेची असणार आहे. पुण्यातील चिंचवड विधानसभा मतदारसंघही राज्याच्या राजकारणात कायम चर्चेस्थानी राहिला. या मतदारसंघामधून भारतीय जनता पक्षाच्या अश्विनी लक्ष्मण जगताप या विद्यमान आमदार आहेत. मात्र, गेल्या दोन तीन वर्षांत राज्याच्या राजकीय समीकरणात झालेल्या बदलामुळे स्थानिक राजकारणातही त्याचा परिणाम पाहायला मिळत आहे. यंदाच्या विधानसभा निवडणुकीत चिंचवडची जनता कोणाला कौल देते? महायुतीला की महाविकास आघाडीला? की अजून इतर कोणत्या पक्षाला? हे आता निवडणुकीनंतर कळणार आहे.
चिंचवड विधानसभा मतदारसंघात महायुती आणि महाविकास आघाडीच्या स्थानिक नेत्यांमध्ये अंतर्गत घडामोडी सुरु असल्याची चर्चा आहे. आता चिंचवड विधानसभा मतदारसंघ हा भाजपाचा बालेकिल्ला समजला जातो. आता चिंचवडच्या विधानसभा मतदारसंघात जगताप कुटुंबातील कुठला उमेदवार निवडणुकीच्या रिंगणात उतरणार? यावरून रस्सीखेच सुरु असल्याचीही चर्चा आहे. तसेच शहराध्यक्ष शंकर जगताप हे निवडणूक लढवण्यावर ठाम असल्याचंही बोललं जात आहे. यातच भाजपातील काही माजी नगरसेवकांनी जगताप कुटुंबातील उमेदवार देण्यास विरोध केल्याचंही बोललं जात आहे. त्यामुळे चिंचवड विधानसभा मतदारसंघात भाजपामधील अंतर्गत राजकारण उफाळून आलं आहे.
यातच राष्ट्रवादी काँग्रेस (अजित पवार) पक्षाच्या स्थानिक काही नेत्यांनी काही दिवसांपूर्वी दबाव तंत्राचा वापर करत चिंचवड विधानसभा मतदारसंघावर दावा केला होता. पक्षातील इच्छुकांनाच उमेदवारी मिळावी, अशी त्यांची मागणी होती. त्यामुळे चिंचवड विधानसभेवरून महायुतीत तिढा निर्माण होण्याची शक्यता व्यक्त केली जात आहे. आता असं असलं तरी विद्यमान आमदाराला उमेदवारी देण्याचा महायुतीचा फॉर्म्युला असल्यांचं नेते सांगतात. त्यामुळे चिंचवड विधानसभा मतदारसंघात महायुतीच्या फॉर्म्युल्यानुसार उमेदवारी मिळणार की जगताप कुटुंबातील दुसरा कोणी उमेदवार असणार? की जगताप कुटुंबाच्या बाहेरील उमेदवार असणार? हे थोड्या दिवसांत स्पष्ट हईल.
दुसरीकडे चिंचवड विधानसभा मतदारसंघात महाविकास आघाडीकडून उमेदवार कोण असणार? याबाबतही अनेकांना उत्सुकता आहे. तसेच महाविकास आघाडीत चिंचवड विधानसभा मतदारसंघ कोणत्या पक्षाला सुटणार? यावरून उमेदवार कोण असणार? हे ठरण्याची शक्यता आहे. मात्र, महाविकास आघाडीतील काही जण प्रचाराला लागल्याचंही बोललं जात आहे. त्यामुळे उमेदवारीसाठी महाविकास आघाडीमध्येही उमेदवारी मिळण्यासाठी रस्सीखेच सुरु असल्याचं बोललं जात आहे. दरम्यान, चिंचवड विधानसभा मतदारसंघात महाविकास आघाडीचा उमेदवार कोण असणार? महायुतीचा उमेदवार कोण असणार? आणि चिंचवडची जनता कोणाला कौल देणार? हे आता पुढच्या काही दिवसांत स्पष्ट होणार आहे. त्यामुळे या निवडणुकीकडे अनेकांचे लक्ष लागलेले आहे.
हेही वाचा : पिंपरी : आशिया खंडातील श्रीमंत महापालिकेतील ४३७ अधिकारी, कर्मचाऱ्यांना अभय?
दरम्यान, २०१९ च्या विधानसभेच्या निवडणुकीत भारतीय जनता पक्षाकडून लक्ष्मण जगताप आणि राहुल कलाटे यांच्यात मुख्य लढत झाली होती. मात्र, लक्ष्मण जगताप यांनी ३८ हजार ४९८ मतांनी बाजी मारत राहुल कलाटे यांचा पराभव केला होता. मात्र, लक्ष्मण जगताप यांचे ३ जानेवारी २०२३ मध्ये निधन झाले. त्यानंतर चिंचवड विधानसभा मतदारसंघात रिक्त झालेल्या जागेसाठी पोटनिवडणूक जाहीर झाली होती. या निवडणुकीत अश्विनी लक्ष्मण जगताप यांनी निवडणूक लढवली आणि त्या विजयी झाल्या होत्या. पोटनिवडणुकीत अश्विनी लक्ष्मण जगताप (Ashwini jagtap), राष्ट्रवादीचे नाना काटे आणि अपक्ष उमेदवार राहुल कलाटे यांच्याच तिरंगी लढाई झाली होती.
मतदारांची संख्या
चिंचवड विधानसभा मतदारसंघात २०१९ साली मतदारांची संख्या ५,१६,८३६ एवढी होती. तसेच २०२३ च्या पोटनिवडणुकीत मतदारांची संख्या ५,६६,४१५ एवढी होती. पुरुष मतदारांची संख्या ३,०१,६४८ तर महिला मतदारांची संख्या २,६४,७३२ एवढी होती.