Lok Sabha Elections 2024 : पूर्व विदर्भात ५७.८२ टक्के मतदानाची नोंद

सर्वाधिक मतदानाची नोंद नक्षलप्रभावित गडचिरोली-चिमूर मतदारसंघात (६६.३० टक्के) तर सर्वात कमी संपूर्णत: शहरी असलेल्या नागपूर मतदारसंघात (५१.५४ टक्के) झाली. रामटेकमध्ये ५५.४६ टक्के, भंडारा-गोंदियात ६१.३७ टक्के आणि चंद्रपूरमध्ये ५७.९ टक्के मतदानाची नोंद झाली.

केंद्रीय मंत्री नितीन गडकरी (नागपूर), राज्याचे वनमंत्री सुधीर मुनगंटीवार (चंद्रपूर) या भाजपच्या दोन दिग्गज उमेदवारांसह नागपूरमधून काँग्रेसचे आ. विकास ठाकरे, चंद्रपूरमधून आ. प्रतिभा धानोरकर, गडचिरोलीतून भाजपचे विद्यमान खासदार अशोक नेते (गडचिरोली), सुनील मेंढे (भंडारा-गोंदिया) यांच्यासह इतर सर्व उमेदवारांचे राजकीय भवितव्य मतदान यंत्रात बंद झाले.

हेही वाचा >>> पंतप्रधान नागपुरात, शनिवारी भाजप पदाधिकाऱ्यांशी चर्चा

राष्ट्रीय स्वयंसेवक संघाचे सरसंघचालक डॉ. मोहन भागवत, उपमुख्यमंत्री देवेंद्र फडणवीस यांनी सकाळी नागपुरात मतदान केले. भंडारा जिल्ह्यात पाहुणी मतदान केंद्रावर ईव्हीएम बंद पडले. याच जिल्ह्यात गोरेगाव तालुक्यातील तिल्ली-मोहगाव केंद्रावर ईव्हीएममधील तांत्रिक बिघाडामुळे मतदान दोन तास विलंबाने सुरू झाले. गडचिरोली जिल्ह्यात तेलंगणा सीमेवरील सिरोंचा तालुक्यात तीन ठिकाणी ईव्हीएम बंद पडले. प्रशासनाने अहेरीतून हेलिकॉप्टरने दुसरे यंत्र मागवले. त्यानंतर मतदान सुरू झाले. मतचिठ्ठयांद्वारे भाजपचा प्रचार केला जात असल्याच्या आरोपावरून काँग्रेस, भाजप कार्यकर्त्यांमध्ये नागपुरात झालेल्या वादावादीचा अपवाद सोडला तर इतरत्र मतदान शांततेत पार पडले.

मतदार यादीतून नावे गहाळ

मतदार यादीतून नावे वगळल्याच्या तक्रारी नागपूरसह सर्वच मतदारसंघात करण्यात आल्या. अनेक मतदारांकडे निवडणूक ओळखपत्र होते, पण त्यांचे नाव यादीत नव्हते. त्यामुळे त्यांना मतदान करता आले नाही. नागपूरमध्ये अशा अनेक तक्रारी आल्या. कुठलीही पूर्वसूचना न देता नावे वगळण्यात आल्याने काही मतदारांनी केंद्रावरच संताप व्यक्त केला. 

किती मतदान?

५१.५४%      नागपूर

६६.३०%   गडचिरोली-चिमूर

५५.४६%      रामटेक

६१.३७%   भंडारा-गोंदिया

५७.९ %       चंद्रपूर