Vidhan Sabha Election Results 2024 : हरियाणा आणि जम्मू-काश्मीरमध्ये विधानसभेसाठी नुकतेच मतदान पार पडले. हरियाणा राज्यात ५ ऑक्टोबर रोजी विधानसभेच्या ९० जागांसाठी एकाच टप्प्यात मतदान झाले, तर जम्मू-काश्मीरमध्ये ३ टप्प्यात झाले. यानंतर आता या दोन्ही निवडणुकीचे निकाल ८ ऑक्टोबरला लागणार आहे. या निकालासाठी मतमोजणी सकाळी ८ वाजता सुरु होणार आहे. दरम्यान, हरियाणा (Haryana Result 2024) आणि जम्मू-काश्मीरमध्ये (Jammu and Kashmir Result 2024) विधानसभा निवडणूक अतिशय चुरशीची झाल्याचं पाहायला मिळालं. त्यामुळे आता या निवडणुकीच्या निकालाकडे देशाचं लक्ष लागलेलं आहे. जम्मू-काश्मीरमध्ये कलम ३७० हटविल्यानंतर पहिल्यांदाच निवडणूक झाल्यामुळे या निवडणुकीला महत्व प्राप्त झालं आहे.

हरियाणातील मतदारांचा सहभाग जवळपास ६७.९० टक्के इतका होता. यामध्ये सिरसा जिल्ह्यातील एलेनाबाद विधानसभेच्या जागेवर सर्वाधिक ८० टक्के मतदान झाले. दरम्यान, ५ ऑक्टोबर रोजी हरियाणात एकाच टप्प्यात मतदान पार पडल्यानंतर या निवडणुकीचे एक्झिट पोल समोर आले. जवळपास सर्वच एक्झिट पोलमध्ये हरियाणात काँग्रेस सत्तेत येण्याची शक्यता वर्तवण्यात आली आहे, तर सत्ताधारी भारतीय जनता पक्षाला धक्का बसण्याची शक्यता वर्तवण्यात आली आहे. मात्र, असं असलं तरी प्रत्येक्षात ८ ऑक्टोबर रोजी निकाल लागल्यानंतर कोणत्या पक्षाला किती जागा मिळाल्या? कोणत्या पक्षाचे सरकार सत्तेत येणार? याबाबत सर्व स्पष्ट होईल.

हेही वाचा : Exit Polls: एग्झिट पोल खरे ठरतात का? हरियाणा व जम्मू-काश्मीरमध्ये काय आहे अनुभव? वाचा २०१४-१९ ची स्थिती!

८ ऑक्टोबर रोजी मतमोजणी कधी सुरु होणार?

हरियाणा आणि जम्मू-काश्मीरमध्ये विधानसभेसाठी निवडणूक पार पडल्यानंतर आता ८ ऑक्टोबर रोजी निकाल जाहीर होणार आहे. या निकालासाठी ८ ऑक्टोबर रोजी सकाळी ८ वाजताच मतमोजणीला सुरुवात होणार आहे. त्यामुळे आता हरियाणातील नागरिकांना निकालाची उत्सुकता लागली आहे.

निकालांचे अपडेट कुठे मिळणार?

८ ऑक्टोबर रोजी निवडणुकीची मतमोजणी सुरु झाल्यानंतर जवळपास दुपारपर्यंत जम्मू- काश्मीर आणि हरियाणात कोणते सरकार येईल? याचे चित्र स्पष्ट होईल. या निकालाचे अपडेट तुम्हाला loksatta.com या वेबसाईटवर वाचायला मिळतील. तसेच भारतीय निवडणूक आयोगाच्या (ECI) results.eci.gov.in अधिकृत संकेतस्थळावरही निकालाचे अपडेट मिळतील. या बरोबरच व्होटर हेल्पलाइन ॲपवरही तुम्हाला अपडेट मिळू शकतील.

३७० कलम हटवल्यानंतर जम्मू -काश्मीरमध्ये पहिल्यांदाच निवडणूक

३७० कलम हटवल्यानंतर जम्मू -काश्मीरमध्ये (Jammu and Kashmir Result 2024) पहिल्यांदाच निवडणूक पार पडली आहे. जम्मू-काश्मीर विधानसभेच्या ९० जागांसाठी तीन टप्प्यात मतदान पार पडले. यामध्ये पहिला टप्पा १८ सप्टेंबर, दुसरा टप्पा २५ सप्टेंबर आणि तिसरा टप्पा १ ऑक्टोबर रोजी मतदान झाले. दरम्यान, ३७० कलम हटवल्यानंतर जम्मू -काश्मीरमध्ये ही निवडणूक होत असल्यामुळे या निवडणुकीकडे देशाचं लक्ष लागलेलं आहे.