“लोकशाहीसाठी अनेकांनी रक्त सांडलंय, त्यामुळेच…”, मतदानानंतर कंगना रणौतचं वक्तव्य

कंगना रणौत म्हणाली, आज लोकसभा निवडणुकीच्या सातव्या टप्प्यात मी आमच्या मतदारसंघात मतदान केलं. मी मतदारसंघातील लोकांमध्ये मतदानाबाबतचा मोठा उत्साह पाहतेय. मी सर्वांना आवाहन करते की सर्वांनी एकत्र येऊन मतदान करा. मतदान हा आपला सर्वात मोठा संविधानिक अधिकार आहे. हा लोकशाहीचा एक मोठा उत्सव आहे. तुम्ही या महापर्वात सहभागी व्हा आणि तुमचं योगदान द्या. तुम्ही जर आमच्या मतदारसंघात पाहिलं तर तिथे एखाद्या सणासारखं वातावरण दिसेल. त्यामुळे मी पुन्हा एकदा आवाहन करेन की सर्वांनी या महापर्वात सहभागी होऊन मतदान करावं. लोकशाही हे आपल्याला मिळालेलं सर्वात मोठं वरदान आहे. मतदानाचा अधिकार मिळावा यासाठी आपल्या बांधवांनी रक्त सांडलं आहे. त्यामुळेच तुम्ही तुमचा मतदानाचा हक्क बजावा आणि आपली लोकशाही आणखी मजबूत करा.

“भारताला २०१४ मध्ये स्वातंत्र्य मिळालं”, असं वादग्रस्त वक्तव्य कंगनाने काही वर्षांपूर्वी केलं होतं. दरम्यान, निवडणुकीच्या प्रचारादरम्यान नुकताच तिने या वक्तव्याचा पुनरुच्चार केला आहे. त्याचबरोबर, “भारत हे एक हिंदू राष्ट्र बनलेलं मला पाहायचं आहे”, असंही ती म्हणाली. कंगना म्हणाली, “आपले पंतप्रधान हे एक युगपुरूष आहेत. आपल्या पूर्वजांनी मुघलांची गुलामी केली. त्यानंतर ब्रिटिशांची गुलामी केली. त्यानंतर आपण काँग्रेसचं कुशासन पाहिलं. त्यामुळे २०१४ मध्ये मोदींचं सरकार आल्यानंतर आपल्याला खऱ्या अर्थाने स्वातंत्र्य मिळालं. विचारांचं स्वातंत्र्य, सनातनचं स्वातंत्र्य, आपला धर्म बनवण्याचं-टिकवण्याचं स्वातंत्र्य, आपल्या देशाला हिंदू राष्ट्र बनवण्याचं स्वातंत्र्य मिळालं.”

हे ही वाचा >> अमित शाह यांची बोचरी टीका, “काँग्रेस एक्झिट पोलच्या चर्चांमध्ये सहभागी होणार नाही कारण त्यांना पराभव…”

भाजपाची लोकसभेची उमेदवार कंगना रणौतने “१९४७ साली धर्माच्या आधारावर पाकिस्तानला इस्लामिक रिपब्लिक स्टेट बनवलं होतं तर, मग भारताला हिंदू राष्ट्र का नाही बनवलं? असा प्रश्न उपस्थित केला. तसेच, “आम्ही भारत देशाला आम्ही हिंदू राष्ट्र बनवणार”, अशी घोषणाही तिने अलीकडेच केली आहे.