Karnataka Vidhan Sabha Election Results 2023: कर्नाटक विधानसभा निवडणुकांचा फैसला आज होणार असून मतमोजणीच्या सुरुवातीच्या कलांमध्ये काँग्रेस आघाडीवर असल्याचं दिसून येत आहे. एक्झिट पोल्समध्येही त्रिशंकू स्थिती वर्तवली असली, तरी त्यात काँग्रेसकडे जास्त जागा असल्याचा अंदाज नमूद करण्यात आला होता. या पार्श्वभूमीवर काँग्रेसकडून कर्नाटक निवडणुकीत स्पष्ट बहुमत मिळण्याचा दावा केला जात असताना दुसरीकडे भाजपाच्या केंद्रीय नेत्यानं भाजपाच्या विजयाचा दावा केला आहे. यासाठी या नेत्यानं गेल्या तीन निवडणुकांमधली आकडेवारी सादर केली आहे.
काँग्रेसकडे मतांची टक्केवारी तर भाजपाकडे जागा अधिक
गेल्या तीन निवडणुकांची आकडेवारी सादर करत भाजपाचे आयटी विभागाचे राष्ट्रीय प्रमुख अमित मालवीय यांनी गणित मांडलं आहे. यासंदर्भात त्यांनी एक सविस्तर ट्वीटच केलं असून त्यामध्ये काँग्रेसकडे मतांची टक्केवारी जरी अधिक असली, तरी भाजपाकडे जास्त जागा येत असल्याचं गेल्या काही निवडणुकांमध्ये दिसून आल्याचा दावा अमित मालवीय यांनी केला आहे.
काय म्हटलंय ट्वीटमध्ये?
“सर्व एक्झिट पोल्सचे अंदाज मतांच्या आकडेवारीवर अवलंबून असतात. या निवडणुकीत कर्नाटकमध्ये ७३.१९ टक्के अर्थात आत्तापर्यंतचं सर्वाधिक मतदान झालं आहे”, असं या ट्वीटमध्ये मालवीय यांनी नमूद केलं आहे.
“२००८ मध्ये भाजपानं ११० जागा जिंकल्या होत्या, पण पक्षाला ३३.८६ टक्के मतं मिळाली होती. दुसरीकडे काँग्रेसला ३४.७६ टक्के मतं मिळूनही जागा फक्त ८० मिळाल्या होत्या. २०१८ साली भाजपानं १०४ जागा जिंकल्या असताना पक्षाला ३६.२२ टक्के मतं मिळाली होती. पण दुसरीकडे काँग्रेसला ३८.१४ टक्के जागा मिळूनही फक्त ८० जागा जिंकता आल्या होत्या”, असं मालवीय यांनी ट्वीटमध्ये म्हटलं आहे.
२०१३ चा अपवाद!
दरम्यान, या ट्रेंडमध्ये २०१३च्या निवडणुका अपवाद ठरल्याचंही मालवीय यांनी नमूद केलं आहे. “२०१३ मध्ये भाजपा आणि कर्नाटक जनता पक्ष यांच्यात हिंदू मतांची विभागणी झाल्यामुळे काँग्रेसला त्याचा फायदा झाला. नाहीतर काँग्रेसला कितीही टक्के मतं मिळाली, तरी त्यांना कधीच ८० जागांच्या वर मजल मारता आलेली नाही”, असा दावाही मालवीय यांनी केला आहे.
“२०२३च्या एक्झिट पोलमध्ये भाजपाला ३७ टक्के मतं मिळतील असा अंदाज आहे. तर काँग्रेसला ४० टक्के मतं मिळण्याचा अंदाज आहे. ३ टक्क्यांचा हा फरक आहे. त्यामुळे निकाल काय येईल, याचा अंदाज कुणालाही बांधता येऊ शकेल”, असंही मालवीय ट्वीटमध्ये म्हणाले आहेत.
