Byculla Vidhan Sabha : राज्यात विधानसभा निवडणुकीच्या पार्श्वभूमीवर अनेक राजकीय घडामोडींना वेग आला आहे. राज्यातील सर्वच दिग्गज नेत्यांनी मतदारसंघात पुन्हा एकदा आपलं वर्चस्व निर्माण करण्यासाठी कंबर कसली आहे. अनेक नेत्यांचे मतदारसंघात दौरे सुरु आहेत. मतदारसंघातील कामांचा आढावा घेतला जात आहे. खरं तर २०२४ ची विधानसभा निवडणूक अनेक नेत्यांसाठी प्रतिष्ठेची मानली जाते. मुंबईतील भायखळा विधानसभा मतदारसंघही राजकारणात चर्चेस्थानी राहिला. या मतदारसंघामधून शिवसेनेच्या (शिंदे गट) यामिनी जाधव या विद्यमान आमदार आहेत. दरम्यान, शिवसेना आणि राष्ट्रवादी काँग्रेस पक्षातील फुटीनंतर राज्याच्या राजकारणाची समीकरणे बदलली. याचा परिणाम स्थानिक राजकारणातही पाहायला मिळतो. राजकीय समीकरणात झालेल्या बदलानंतर आता २०२४ च्या विधानसभा निवडणुकीत भायखळा विधानसभा मतदारसंघावर यंदा कुणाचा झेंडा फडकणार? महायुती बाजी मारणार की महाविकास आघाडी? हे येत्या काही दिवसांत स्पष्ट होईल.
खरं तर एकेकाळी भायखळा विधानसभा मतदारसंघ हा काँग्रेसचा बालेकिल्ला म्हणून ओळखला जायचा. मात्र, काँग्रेसच्या या बालेकिल्ल्याला नंतर खिंडार पडले. २०१४ च्या विधानसभा निवडणुकीत ‘एआयएमआयएम’चे वारिस पठाण या मतदारसंघातून आमदार झाले. त्यानंतर २०१९ च्या विधानसभा निवडणुकीत शिवसेनेच्या यामिनी जाधव यांनी ‘एआयएमआयएम’च्या वारिस पठाण यांचा पराभव केला आणि त्या आमदार झाल्या. शिवसेनेच्या (शिंदे गट) यामिनी जाधव यांनी २०२४ च्या लोकसभा निवडणुकीत दक्षिण मुंबई लोकसभा मतदारसंघातून निवडणूक लढवली होती. मात्र, या निवडणुकीत यामिनी जाधव यांना भायखळ्यातूनच पिछाडी मिळाली आणि त्यांचा पराभव झाला. त्यामुळे आता विधानसभेला यामिनी जाधव यांना पुन्हा उमेदवारी मिळणार की नाही? याबाबत अनेक तर्कवितर्क लावले जात आहेत.
दरम्यान, भायखळा विधानसभा मतदारसंघात शिवसेना ठाकरे गटासह काँग्रेसनेही या चाचपणी केली आहे. त्यामुळे भायखळा मतदारसंघात महाविकास आघाडी विरुद्ध महायुती अशी थेट लढत होण्याची शक्यता आहे. मात्र, महायुती आणि महाविकास आघाडीचे उमेदवार कोण असणार? हे लवकरच स्पष्ट होईल. दरम्यान, भायखळा विधानसभा मतदारसंघात मुस्लीम मतदार, मराठी मतदार आणि अमराठी मतदारांची संध्या जास्त आहे. त्यामुळे हे मतदार कोणाला कौल देतात? हे पाहणं महत्वाचं ठरणार आहे.
दरम्यान, २०१९ च्या विधानसभा निवडणुकीत शिवसेना (शिंदे) पक्षाच्या यामिनी यशवंत जाधव या ५१,१८० मते मिळवून विजयी झाल्या होत्या. तर एमआयएमचे वॉरिस युसुफ पठाण यांना दुसऱ्या क्रमांकाची ३१,१५७ मते मिळाली होती. तसेच काँग्रेसचे अण्णा मधु चव्हाण २४,१३९ मते मिळाली होती. तसेच अखिल भारतीय सेनेच्या गीता अजय गवळी यांना १०,४९३ मते मिळाली होती तर नोटाला २,७९१ मतदान पड़ले होते.
मतदारांची संख्या
भायखळा विधानसभा मतदारसंघात २०१९ च्या आकडेवारीनुसार, पुरुष मतदारांची संख्या १,२३,६१६ तर महिला मतदारांची संख्या १,०३,५२० एवढी आहे. तसेच एकूण मतदारांची संध्या २,२७,१४३ एवढी आहे. मात्र, आता आता मतदारांच्या आकडेवारीत बदल झालेला असू शकतो.
