Sharad Pawar NCP 4th Candidate List : मोठी बातमी! शरद पवारांच्या राष्ट्रवादीची चौथी यादी जाहीर; सात उमेदवारांची घोषणा, कोणाला कुठून मिळाली संधी?

राष्ट्रवादी काँग्रेस (शरद पवार) पक्षाकडून एक्स या मायक्रोब्लॉगिंग प्लॅटफॉर्मवर यादी प्रसिद्ध करण्यात आली आहे. यामध्ये माण मतदारसंघासाठी प्रभाकर घार्गे, काटोल-सलील अनिल देशमुख, खानापूर-वैभव पाटील, वाई-अरुणादेवी पिसाळ, दौंड-रमेश थोरात, पुसद- शरद मेंद, सिंदखेडा-संदीप बेडसे यांच्या नावाचा समावेश आहे. दरम्यान, शरद पवारांच्या राष्ट्रवादी काँग्रेस पक्षाकडून याआधी तीन याद्या जाहीर करण्यात आल्या आहेत.

अनिल देशमुखांच्या मुलाला उमेदवारी

राष्ट्रवादी काँग्रेस शरदचंद्र पवार पक्षाचे नेते तथा माजी गृहमंत्री अनिल देशमुख यांचे चिरंजीव सलील देशमुख यांना काटोल विधानसभा मतदारसंघामधून उमेदवारी देण्यात आली आहे. दरम्यान, अनिल देशमुख यांनी विधानसभा निवडणुकीच्या मैदानातून माघार घेतली आहे. त्यांच्या ऐवजी त्यांचा मुलगा सलील देशमुख हे आता निवडणुकीच्या मैदानात असणार आहेत. अनिल देशमुख यांनी माघार घेतल्यामुळे आता पक्षाकडून त्यांच्या मुलाला उमेदवारी जाहीर करण्यात आली आहे.

कोणत्या सात उमेदवारांची यादी जाहीर झाली? वाचा यादी!

दरम्यान, राष्ट्रवादी काँग्रेस शरदचंद्र पवार पक्षाकडून २४ ऑक्टोबर रोजी ४५ उमेदवारांची पहिली यादी जाहीर करण्यात आली होती. त्यानंतर २६ ऑक्टोबर रोजी २२ उमेदवारांची दुसरी यादी जाहीर करण्यात आली होती. त्यानंतर पुन्हा २७ ऑक्टोबर रोजी ९ उमेदवारांची तिसरी यादी जाहीर करण्यात आली होती. यानंतर आता आज ७ उमेदवारांची यादी चौथी यादी जाहीर करण्यात आली आहे. दरम्यान, विधानसभेच्या निवडणुकीसाठी २० नोव्हेंबर रोजी मतदान पार पडणार आहे, या निवडणुकीसाठी उमेदवारी अर्ज दाखल करण्यासाठी आता उद्या २९ ऑक्टोबर रोजी शेवटचा दिवस आहे. त्यामुळे अनेक नेत्यांनी आज उमेदवारी अर्ज दाखल केले आहेत. तसेच राहिलेल्या उमेदवारांच्या याद्याही आता जाहीर करण्यात येत आहेत. या पार्श्वभूमीवर आज शरद पवारांच्या राष्ट्रवादीकडून सात उमेदवारांची यादी जाहीर करण्यात आली आहे.