Ambegaon Assembly Elections 2024 : विधानसभा निवडणुकीच्या अनुषंगाने राजकीय घडामोडींना वेग आला आहे. राज्यातील अनेक दिग्गज नेत्यांनी मतदारसंघात पुन्हा एकदा आपलं वर्चस्व निर्माण करण्यासाठी कंबर कसली आहे. अनेक नेत्यांचे मतदारसंघात दौरे सुरु आहेत. मतदारसंघातील कामांचा आढावा राजकीय नेते मंडळी घेत आहेत. राज्यातील अनेक मतदारसंघात २०२४ ची विधानसभा निवडणूक अनेक नेत्यांसाठी प्रतिष्ठेची मानली जाते. आता राज्याच्या राजकारणात चर्चेत असलेल्या पुण्यातील आंबेगाव विधानसभा मतदारसंघात (Ambegaon Assembly Elections 2024) विधानसभेच्या निवडणुकीसाठी महायुतीत (Mahayuti) रस्सीखेच सुरु आहे.
आंबेगाव मतदारसंघामधून राष्ट्रवादी काँग्रेस (अजित पवार) पक्षाचे नेते दिलीप वळसे पाटील (Dilip Walse Patil) हे विद्यमान आमदार आहेत. मात्र, शिवसेना आणि राष्ट्रवादी काँग्रेस (NCP) पक्षातील फुटीनंतर राज्याच्या राजकारणाची समीकरणे बदलली. याचा परिणाम स्थानिक राजकारणातही पाहायला मिळतो. राजकीय समीकरणात झालेल्या बदलानंतर आता विधानसभा निवडणुकीत आंबेगाव विधानसभा मतदारसंघामध्ये महायुती आणि महाविकास आघाडीमध्ये रस्सीखेच सुरु आहे. त्यामुळे विधानसभेच्या निवडणुकीत आंबेगाव विधानसभा मतदारसंघात कुणाचा झेंडा फडकणार? महायुती बाजी मारणार की महाविकास आघाडी? तसेच दिलीप वळसे पाटील पुन्हा एकदा आपलं वर्चस्व राखणार का? हे आता लवकरच स्पष्ट होईल.
हेही वाचा : Byculla Vidhan Sabha : विधानसभेला भायखळा मतदारसंघात कोण बाजी मारणार? महाविकास आघाडी की महायुती?
आंबेगाव विधानसभा मतदारसंघात मुख्य लढत महाविकास आघाडी विरुद्ध महायुती अशी होत आहे. गेली ३० ते ३५ वर्ष आंबेगाव तालुक्याचे नेतृत्व दिलीप वळसे पाटील करत आहेत. आता पुन्हा एकदा अजित पवारांच्या राष्ट्रवादीकडून त्यांना उमेदवारी मिळाली. दरम्यान, वळसे पाटील यांची कन्या पूर्वा दिलीप वळसे पाटील विधानसभेची निवडणूक लढवणार अशा चर्चा राजकीय वर्तुळात होत्या. मात्र, काही दिवसांपूर्वी दिलीप वळसे पाटील यांनी स्वत: जनसन्मान यात्रेत या सर्व चर्चांना पूर्णविराम दिला होता. ‘माझी मुलगी निवडणूक लढवणार नाही’, असं त्यांनीच सांगितलं होतं. तसेच मी स्वतः विधानसभेची निवडणूक नाईलाजास्तव लढवत असल्याचं विधानही त्यांनी केलं. मात्र, यावरूनच आंबेगाव विधानसभेची जागा शिवसेनेला सोडावी, अशी मागणी शिवसेनेकडून (शिंदे गट) करण्यात आली होती. त्यामुळे आंबेगावमध्ये महायुतीमधील अंतर्गत वाद चव्हाट्यावर आला होता. मात्र, अखेर दिलीप वळसे पाटील यांनाच उमेदवारी जाहीर झाली. त्यामुळे आता दिलीप वळसे पाटील हे निवडणुकीच्या मैदानात आहेत.
दुसरीकडे राष्ट्रवादी काँग्रेस (शरद पवार) पक्षाचे देवदत्त निकम यांना आंबेगावसाठी उमेदवारी मिळाली आहे. त्यामुळे आंबेगाव विधानसभा मतदारसंघात कोण बाजी मारणार? हे आता लवकरच स्पष्ट होईल. मात्र, असं असलं तरी आंबेगावमध्ये अटीतटीची लढत होईल, असा अंदाज राजकीय जाणकारांनी वर्तवला आहे. दरम्यान, आंबेगाव मतदारसंघात महायुती सरकारच्या काळात केलेल्या विकास कामांच्या जोरावर दिलीप वळसे पाटील यांनी निवडणुकीच्या प्रचाराला सुरुवात केली आहे. दिलीप वळसे पाटील यांनी आंबेगाव विधानसभा मतदारसंघाचे सलग सात वेळा प्रतिनिधित्व केलं आहे. त्यामुळे या मतदारसंघात दिलीप वळसे पाटील यांची ताकद मोठी मानली जाते. आता या २०२४ च्या विधानसभेच्या निवडणुकीत दिलीप वळसे पाटील हे आपला बालेकिल्ला राखणार का? की आंबेगावला नवा आमदार मिळणार? हे मतदानानंतर स्पष्ट होणार आहे.
दरम्यान, २०१९ च्या विधानसभा निवडणुकीत दिलीप वळसे पाटील यांनी १,२६,१२० मते मिळवून विजय मिळवला होता, तर शिवसेना (Shivsena) पक्षाचे बाणखेले राजाराम भिवसेन यांना दुसऱ्या क्रमांकाची ५९,२१२ मते मिळाली होती. या निवडणुकीत दिलीप वळसे पाटील यांनी शिवसेनेच्या बाणखेले राजाराम भिवसेन यांचा ६६७७५ मतांनी पराभव करून विजय मिळवला होता.
मतदारांची संख्या
पुणे जिल्ह्यात आंबेगाव हा (विधानसभा क्र.१९६) विधानसभा मतदारसंघ आहे. या मतदारसंघात २०१९ च्या आकडेवारीनुसार, पुरुष मतदारांची संख्या १,४१,१९७ तर महिला मतदारांची संख्या १,२८,९३६ एवढी आहे. तसेच एकूण मतदारांची संख्या २,७०,१३३ एवढी आहे.
