Maharashtra Assembly Election 2024 Shivsena vs Shivsena : महाराष्ट्र विधानसभा निवडणुकीसाठी बुधवारी (२० नोव्हेंबर) मतदान पार पडलं. यावेळी निवडणुकीच्या रिंगणात अनेक पक्ष व हजारो उमेदवार आहेत. उद्या (शनिवार, २३ नोव्हेंबर) या निवडणुकीचा निकाल जाहीर होईल. दरम्यान, खरी शिवसेना कोणाची? खरी राष्ट्रवादी कोणाची? या प्रश्नांची उत्तरं देखील मिळतील. एकनाथ शिंदेंबरोबर जास्त आमदार असल्याने निवडणूक आयोगाने त्यांच्या गटाला खरी शिवसेना म्हणून मान्यता दिली आहे. त्यामुळे उद्धव ठाकरे यांच्या गटाला नवं नाव आणि नवं निवडणूक चिन्ह घेऊन ही निवडणूक लढवावी लागली. मात्र, आता निवडणुकीत मतदार कोणत्या शिवसेनेची निवड करणार? जनतेच्या न्यायालयात खरी शिवसेना म्हणून कोणाला मान्यता मिळणार? याकडे सर्वांचं लक्ष लागलं आहे. शिवसेनेचा बालेकिल्ला मानल्या जाणाऱ्या मुंबई महानगर प्रदेशात १९ जागांवर आणि एकट्या मुंबईत १२ मतदारसंघात ठाकरेंची शिवसेना विरुद्ध शिंदेंची शिवसेना असा थेट सामना होणार आहे. मराठवाडा आणि कोकणात आठ, विदर्भात सहा, उत्तर आणि पश्चिम महाराष्ट्रात प्रत्येकी चार जागांवर शिवसेना विरुद्ध शिवसेना अशी लढत होईल. मतदारांच्या नजरेतील बाळासाहेबांचा खरा वारसदार कोण? याचा निकाल या माध्यमातून लागणार आहे.
यंदाची विधानसभा निवडणूक ही उद्धव ठाकरे आणि त्यांच्या गटासाठी लिटमस टेस्टसारखी आहे. आपल्या वडिलांचा खरा वारसदार कोण? हे सिद्ध करण्याची संधी त्यांच्याकडे चालून आली आहे. तसेच अधिकच्या जागा जिंकून महाविकास आघाडीत मुख्यमंत्रिपदाचा दावा करण्यासाठीही ही निवडणूक त्यांच्यासाठी महत्त्वाची मानली जात आहे. दुसऱ्या बाजूला मुख्यमंत्री एकनाथ शिंदे यांच्यासमोरही शिवसेना पक्षाचे जास्तीत जास्त आमदार निवडून आणण्याचं आव्हान आहे. त्यांच्याबरोबर गेलेल्या ४० आमदारांची आमदारकी टिकवणं आणि काही नवे आमदार निवडून आणणं त्यांच्यासमोरचं मोठं आव्हान आहे. ५० हून अधिक आमदार निवडून आले तर कदाचित त्यांना पुन्हा एकदा मुख्यमंत्रिपदही मिळण्याची शक्यता राजकीय वर्तुळात वर्तवली जात आहे.
हे ही वाचा >>महायुतीची सत्ता आल्यास एकनाथ शिंदे मुख्यमंत्री होणार? शिवसेना नेत्यांची मोर्चेबांधणी; भाजपाचाही पाठिंबा?
‘हे’ ४९ मतदारसंघ ठरवणार खरी शिवसेना कोणाची
राज्यातील एकूण ४९ मतदारसंघांमध्ये शिवसेना (ठाकरे) विरुद्ध शिवसेना (शिंदे) पक्षाचे उमेदवार आमने सामने उभे ठाकले आहेत. या ४९ मतदारसंघांवर संपूर्ण राज्याचं लक्ष लागलेलं असेल. या ४९ पैकी जास्त जागा जो पक्ष जिंकेल तो पक्ष बाळासाहेब ठाकरेंच्या विचारांवर चालणारा पक्ष आमचाच आहे, आम्हीच मूळ शिवसेना आहोत असा दावा करू शकेल.
| क्र. | मतदारसंघ | शिवसेना (शिंदे) | शिवसेना (ठाकरे) |
| 1 | मागाठाणे | प्रकाश सुर्वे | उदेश पाटेकर |
| 2 | भांडुप पश्चिम | अशोक पाटील | रमेश कोरगावकर |
| 3 | जोगेश्वरी पूर्व | मनीषा वायकर | अनंत नर |
| 4 | दिंडोशी | संजय निरुपम | सुनील प्रभू |
| 5 | चेंबूर | तुकाराम काते | प्रकाश फातर्पेकर |
| 6 | माहीम | सदा सरवणकर | महेश सावंत |
| 7 | भायखळा | यामिनी जाधव | मनोज जामसुतकर |
| 8 | वरळी | मिलिंद देवरा | आदित्य ठाकरे |
| 9 | विक्रोळी | सुवर्णा कारंजे | सुनील राऊत |
| 10 | कुर्ला | मंगेश कुडाळकर | प्रविणा मोरजकर |
| 11 | अंधेरी पूर्व | मुरजी पटेल | ऋतुजा लटके |
| 12 | कुडाळ | निलेश राणे | वैभव नाईक |
| 13 | रत्नागिरी | उदय सामंत | बाळा माने |
| 14 | राजापूर | किरण सामत | राजन साळवी |
| 15 | सावंतवाडी | दीपक केसरकर | राजन तेली |
| 16 | महाड | भरत गोगावले | स्नेहल जगताप |
| 17 | दापोली | योगेश कदम | संजय कदम |
| 18 | गुहागर | राजेश बेंडल | भास्कर जाधव |
| 19 | कर्जत | महेंद्र थोरवे | नितीन सावंत |
| 20 | पालघर | राजेंद्र गावित | जयेंद्र दुबळा |
| 21 | अंबरनाथ | बालाजी किणीकर | राजेश वानखेडे |
| 22 | बोईसर | विलास तरे | विश्वास वळवी |
| 23 | भिवंडी ग्रामीण | शांताराम मोरे | महादेव घाटाळ |
| 24 | कल्याण पश्चिम | विश्वनाथ भोईर | सचिन बासरे |
| 25 | कल्याण ग्रामीण | राजेश मोरे | सुभाष भोईर |
| 26 | ओवळा माजिवडा | प्रताप सरनाईक | नरेश मनेरा |
| 27 | कोपरी पाचपाखाडी | एकनाथ शिंदे | केदार दिघे |
| 28 | छत्रपती संभाजीनगर पश्चिम | संजय शिरसाट | राजू शिंदे |
| 29 | छत्रपती संभाजीनगर मध्य | प्रदीप जैस्वाल | बाळासाहेब थोरात |
| 30 | परभणी | आनंद भरोसे | राहुल पाटील |
| 31 | सिल्लोड | अब्दुल सत्तार | सुरेश बनकर |
| 32 | पैठण | विलास भुमरे | दत्ता गोर्डे |
| 33 | कन्नड | संजना जाधव | उदयसिंह राजपूत |
| 34 | वैजापूर | रमेश बोरनारे | दिनेश परदेशी |
| 35 | धाराशिव | अजित पिंगळे | कैलास पाटील |
| 36 | उमरगा | ज्ञानराज चौगुले | प्रवीण स्वामी |
| 37 | कळमनुरी | संतोष बांगर | संतोष टारफे |
| 38 | चोपडा | चंद्रकांत सोनवणे | प्रभाकर सोनवणे |
| 39 | नांदगाव | सुहास कांदे | गणेश धात्रक पाचोरा |
| 40 | मालेगाव बाह्य | दादा भुसे | अद्वय हिरे |
| 41 | बार्शी | राजेंद्र राऊत | दिलीप सोपल |
| 42 | सांगोला | शहाजी पाटील | दीपक साळुंखे |
| 43 | राधानगरी | प्रकाश आबिटकर | के.पी पाटील पाटण |
| 44 | नेवासा | विठ्ठलराव लंघे | शंकरराव गडाख |
| 45 | बुलढाणा | संजय गायकवाड | जयश्री शेळके |
| 46 | मेहकर | संजय रायमूलकर | सिद्धार्थ खरात |
| 47 | बाळापूर | बळीराम शिरसकर | नितीन देशमुख |
| 48 | रामटेक | आशीष जैस्वाल | विशाल बरबटे |
| 49 | दर्यापूर | अभिजीत अडसूळ | गजानन लवटे |
| 50 | पाटण | शंभूराज देसाई | हर्षद कदम |
| 51 | पाचोरा | किशोर पाटील | वैशाली सूर्यवंशी |
