Maharashtra Vidhan Sabha Election Results 2024 Live Updates: त्रिशंकू की स्थिर सरकार? विधानसभेच्या निकालासाठी उरले अवघे काही तास

महाराष्ट्रातील गडचिरोली आणि झारखंडमधील गिरिडीहसह दोन्ही राज्यांतील डाव्या विचारसरणीने (LWE) प्रभावित भागात मतदान सुव्यवस्थितपणे पार पडले. पहिल्यांदाच मतदानासाठी पात्र ठरलेले मतदार, वृद्ध मतदार, आदिवासी मतदार, सार्वजनिक बांधकाम विभागासाठी काम करणारे कामगार मतदार, महिला मतदार, हातात मुले घेऊन आलेले मतदार, तृतीयपंथी मतदार, मतदारांची संपूर्ण कुटुंबे आणि वलयांकित मान्यवर मतदार यांसह समाजातील विविध घटकांतील मतदारांच्या लांबलचक रांगांनी मतदान केंद्रांवरील वातावरण वैशिष्ट्यपूर्ण बनले होते.शौचालय, रॅम्प, शेड, पिण्याचे पाणी यासह खात्रीशीर किमान सुविधांनी (AMF), मतदारांना कोणत्याही अडथळ्याशिवाय आरामात मतदान करता येईल याची हमी दिली.

सुलभ मतदानासाठी आणि प्रोत्साहनपर मोहिमांसाठी आयोगाने अनेक उपाययोजना राबवूनही, राज्यातील शहरी मतदारांनी मुंबई, पुणे आणि ठाणे यांसारख्या शहरांमध्ये कमी मतदानाची आपली निराशाजनक परंपरा कायम ठेवली. या उलट ग्रामीण भागात मतदारांनी मोठ्या प्रमाणात बाहेर पडून मतदान केले.

राज्यातील २८८ विधानसभा मतदारसंघात सरासरी ६५ टक्के मतदान झाले. ४ हजार १३६ उमेदवारांचे भवितव्य सकाळी मतपेटीतून बाहेर येणार आहे. राज्यात विजयाचा गुलाल कोण उधळणार? याचा उलगडा काही तासांत होणार आहे.

लोकसभा निवडणुकीदरम्यान मराठवाड्यात मनोज जरांगे फॅक्टर जोरदार चालला. आठपैकी सात मतदारसंघात महायुतीचा पराभव झाला. तर छत्रपती संभाजीनगर हा एकच लोकसभा मतदारसंघ महायुतीला मिळाला. यावेळी विधानसभा निवडणुकीतही पुन्हा एकदा मनोज जरांगे पाटील यांचा फॅक्टर पाहायला मिळणार का? हे आता निकालातून दिसून येईल.

बुधवारी जाहीर झालेल्या एकूण एक्झिट पोल्सपैकी प्रमुख १० संस्थांचे अंदाज (निवडणूक निकालाचे एक्झिट पोल) पाहिले तर त्यापैकी सहा अंदाज हे महायुतीच्या बाजूने आहेत, तर तीन संस्थांच्या मते राज्यात महाविकास आघाडीला बहुमत मिळू शकतं. एका पोलमध्ये राज्यात त्रिशंकू स्थिती निर्माण होईल असा अंदाज वर्तवण्यात आला आहे. दरम्यान, अनेक एक्झिट पोल्समध्ये अपक्ष व इतर पक्षांच्या आमदारांची संख्या २० ते ३० च्या आसपास असेल असा अंदाज वर्तवण्यात आला आहे. याचाच अर्थ राज्यात त्रिशंकू स्थिती झाल्यास किंवा महाविकास आघाडी व महायुती या दोन्ही आघाड्या बहुमताच्या जवळ पोहोचल्या तर या अपक्षांची व छोट्या पक्षांची भूमिका खूप महत्त्वाची असेल. सविस्तर बातमी वाचा

महाविकास आघाडी आणि महायुतीकडूनही सरकार स्थापनेबाबत दावे करण्यात येत आहेत. मात्र, काही एक्झिट पोलच्या अंदाजानुसार महायुती आणि महाविकास आघाडीला सत्तास्थापनेसाठी अपक्षाची मदत लागू शकते. त्यामुळे महाविकास आघाडी आणि महायुतीच्या नेत्यांकडून निकालाच्या आधीच अपक्ष निवडणूक लढवणाऱ्या उमेदवारांशी आणि छोट्या पक्षांबरोबर संपर्क सुरु असल्याची चर्चा राजकीय वर्तुळात आहे. सविस्तर वाचा

शनिवारी (दि. २३ नोव्हेंबर) सकाळी ८ वाजता महाराष्ट्र विधानसभा निवडणुकीच्या मतमोजणीला सुरुवात होईल. दुपारी १२ वाजेपर्यंत साधारण आघाडीवर कोण असेल, याचे चित्र स्पष्ट होईल. मतमोजणी होणाऱ्या केंद्रावर सुरक्षा दलाचा चोख बंदोबस्त ठेवण्यात आला आहे.