Thackeray vs Shinde Lok Sabha Election Result 2024 Updates : मुंबईत ठाकरेंचे दोन, भाजपा अन् शिंदे गटाचा एक उमेदवार विजयी घोषित; दोन जागांवरचा निकाल प्रतिक्षेत!

वर्षा गायकवाड आणि उज्ज्वल निकम यांच्या उत्तर-मध्य मुंबई मतदारसंघ मुंबईतील सहा मतदारसंघांमध्ये सर्वाधिक मराठी आणि मुस्लीम मतदारांचा म्हणून ओळखला जातो. येथे मराठी ३४ टक्के आणि मुस्लीम २४ टक्के मतदार आहेत. या वेळी पाचव्या टप्प्याचे मुंबईतील मतदान सर्वत्र संथ पार पडले. या मतदारसंघात ५१.४२ टक्के मतदान नोंदले आहे. वर्षा गायकवाड या महिला उमेदवार असूनही येथे महिलांनी मतदानाकडे पाठ फिरवल्याचे दिसले.

सविस्तर वृत्त

माहिम, वडाळा, सायन कोळीवाडा, चेंबूर, आणि अणूशक्तीनगर या सहा विधानसभा मतदार संघाच्या दक्षिण मध्य मुंबई लोकसभा मतदार संघातील लढतीकडे संपूर्ण महाराष्ट्राचे लक्ष लागून राहिले आहे. शिंदे गटाचे राहुल शेवाळे विरुद्ध अनिल देसाई यांच्यात येथे लढत आहे. जवळपास पंधरा लाख मतदार संख्या (१४ लाख ५६ हजार ३३९) असलेल्या या मतदार संघात धारावी, दादर, वडाळा ह्या भागातील कष्टकरी, मध्यमवर्गीय मतदार उमेदवाराचे भवितव्य ठरवत असल्याचे यापूर्वीच्या निकालावरुन दिसून येते. अणूशक्तीनगर (नबाब मलिक, राष्ट्रवादी) चेंबूर ( प्रकाश फातर्फेकर, ठाकरे गट) सायन कोळीवाडा ( कॅप्टन तमिळ सेल्वन, भाजप) वडाळा ( कालिदास कोळंबकर, भाजप) धारावी (वर्षा गायकवाड, काँग्रेस) आणि माहिम (सदा सरवणकर, शिंदे गट) असे भाजपचे दोन आणि काँग्रेस, राष्ट्रवादी, शिंदे गट, व ठाकरे गटाचे प्रत्येकी एक आमदार आहेत. लोकसभा निवडणूक ही विधानसभेची रंगती तालीम असल्याने हे आमदार आपल्या मतदार संघात लोकसभा उमेदवाराला जास्तीत जास्त मतधिक्य मिळवून देण्याचा प्रयत्न करणार आहेत.

सविस्तर वृत्त वाचा

कुलाबा, मुंबादेवी, मलबार हिल, भायखळा, शिवडी आणि वरळी या सहा विधानसभा मतदारसंघांचा दक्षिण मुंबई लोकसभा मतदारसंघात समावेश आहे. या मतदारसंघात सहापैकी तीन शिवसेना, दोन भाजप आणि एक काँग्रेस असे आमदारांचे बलाबल होते. गुजराती, जैन, मारवडी मतदारांची संख्या लक्षणीय असल्याने भाजपचा या मतदारसंघावर डोळा होता. परंतु, येथे दोन्ही मराठी उमेदवारांना संधी मिळाली आहे. ठाकरे गटाकडून विद्यमान खासदार अरविंद सावंत उभे आहेत, तर शिंदे गटाकडून विद्यमान आमदार यामिनी जाधव यांना संधी देण्यात आली.

सविस्तर वाचा

दक्षिण मुंबई – अरविंद सावंत (ठाकरे गट) वि. यामिनी जाधव (शिंदे गट)

दक्षिण मध्य मुंबई – राहुल शेवाळे (शिंदे गट) वि. अनिल देसाई (ठाकरे गट)

उत्तर मुंबई – पियुष गोयल (भाजपा) वि. भूषण पाटील (काँग्रेस)

वायव्य मुंबई – अमोल किर्तीकर (ठाकरे गट) वि. रविंद्र वायकर (शिंदे गट)

उत्तर मध्य मुंबई – उज्ज्वल निकम (भाजपा) वि. वर्षा गायकवाड (काँग्रेस)

ईशान्य मुंबई – मिहीर कोटेचा (भाजपा) वि. संजय दिना पाटील (ठाकरे गट)

ठाणे – राजन विचारे (ठाकरे गट) वि. नरेश म्हस्के (शिंदे गट)

कल्याण – श्रीकांत शिंदे (शिंदे गट) वि. वैशाली दरेकर (ठाकरे गट)

भिवंडी – कपिल पाटील (भाजपा) वि. बाळ्यामामा म्हात्रे (शरद पवार गट)

देशात पार पडलेल्या लोकसभा निवडणुकीची मंगळवारी मतमोजणी होणार असून निकालाच्या पार्श्वभूमीवर शहरात कोणताही अनुचित प्रकार घडू नये यासाठी मुंबई पोलिसांनी शहरात कडेकोट बंदोबस्त ठेवला आहे. मुंबईतील सहा लोकसभा मतदारसंघात झालेल्या मतदानाची मतमोजणी तीन केंद्रांवर होणार आहे. त्यामुळे सुरक्षेच्या दृष्टीने तेथे विशेष उपाययोजना करण्यात आल्या आहेत.

वाचा सविस्तर वृत्त