“डोळ्यांसमोर कमळ येईल, पण तुम्ही घड्याळाचेच बटन दाबा…” धनंजय मुंडेंच्या समोरच काय म्हणाल्या पंकजा? पाहा व्हिडिओ

काय म्हणाल्या पंकजा मुंडे?

परळीतील या कार्यक्रमात बोलताना पंकजा मुंडे म्हणाल्या, “धनंजय विद्यमान आमदार आहे. त्यामुळे त्यालाच ही जागा मिळणार होती. मला महित आहे, मतदानाच्या दिवशी मतदान यंत्रांवर तुम्ही कमळाचे बटनच शोधणार आहात. कारण तुमच्या डोक्यात कमळच बसले आहे. पण असू द्या, त्यादिवशी जा आणि घड्याळाचेच बटन दाबा. मला वाटते हे सगळे करण्यापेक्षा धनंजयने कमळच हातात घेतले असते तर बरे झाले असते.”

४० वर्षांनी परळीतून कमळ गायब

यंदाच्या विधानसभा निवडणुकीत भारतीय जनता पक्ष महायुतीच्या माध्यमातून लढत आहे. यामध्ये एकनाथ शिंदे यांची शिवसेना आणि अजित पवार यांची राष्ट्रवादीही आहे. महायुतीमध्ये ज्या मतदारसंघांत ज्यांचा आमदार ती जागा त्या पक्षाला असा ठराव झाल्याचं सांगितलं जातं. त्यानुसार ही जागा राष्ट्रवादी काँग्रेसला गेली. कारण गेल्यावेळी इथून धनंजय मुंडे विजयी झाले होते. यंदा ही जागा राष्ट्रवादीला सुटल्यामुळे ४० वर्षांत पहिल्यांदाच इथे कमळाच्या चिन्हावरील उमेदवार निवडणूक लढवणार नाही. १९७८ ची निवडणूक वगळता त्यानंतर झालेल्या प्रत्येक निवडणुकीत परळीतून कमळाच्या चिन्हावर भाजप उमेदवार लढला होता.

काय होता २०१९ चा निकाल?

२०१९ च्या विधानसभा निवडणुकीत त्यावेळी मंत्री असलेल्या पंकजा मुंडे भाजपकडून मैदानात होत्या. तर, दुसरीकडे राष्ट्रवादीकडून विधान परिषदेचे विरोधी पक्षनेते धनंजय मुंडे लढत होते. सुरुवातीला एकतर्फी वाटत असलेल्या या लढतीत, अनपेक्षितपणे धनंजय मुंडे यांनी ३० हजारांहून अधिक मतांनी बाजी मारली होती. यामध्ये धनंजय मुंडेंना १,२२,११४ तर पंकजा यांना ९१,४१३ मते मिळाली होती.