“भाजपाचा विजय झाला तर उद्धव ठाकरेसंह इतर नेते तुरुंगात जातील”, मोदींच्या मोहिमेविषयी केजरीवाल काय म्हणाले?

“मोदी लवकरच निवृत्त होणार, अमित शाह पंतप्रधान होतील”; अरविंद केजरीवाल यांचा खळबळजनक दावा

लोकसभेत विजय मिळाला तर उद्धव ठाकरे तुरुंगात असतील

पंतप्रधान मोदी हे ‘एक राष्ट्र, एक नेता’ मोहीम राबवत आहेत, अशी टीका केजरीवाल यांनी केली. “मला तुरुंगात टाकून त्यांनी देशातील सर्व विरोधकांना संदेश दिला. जर हेमंत सोरेन आणि अरविंद केजरीवाल यांना आम्ही तुरुंगात टाकू शकतो, तर ४ जून रोजी सत्ता आली तर देशातील कोणत्याही नेत्याला आम्ही तुरुंगात टाकू शकतो. जर भाजपाची सत्ता आली तर ममता बॅनर्जी, स्टॅलिन, उद्धव ठाकरे आणि इतर विरोधी पक्षाचे नेते तुरुंगात असतील”, असा आरोप केजरीवाल यांनी केला.

“विरोधी पक्षच नाही तर भाजपाने स्वतःच्या नेत्यांनाही संपविले. शिवराज सिंह चौहान, वसुंधरा राजे, लालकृष्ण आडवाणी यांच्यासारखे कैक नेते त्यांनी संपविले. लोकसभेत विजय मिळू द्या, दोन महिन्यात ते उत्तर प्रदेशच्या योगी आदित्यनाथ यांनाही संपवले जाईल”, असा दावा अरविंद केजरीवाल यांनी केला.

पंतप्रधान मोदी ७५ वर्षांचे झाल्यानंतर काय?

अरविंद केजरीवाल यांनी पंतप्रधान मोदींच्या पंतप्रधान पदावरही प्रश्नचिन्ह उपस्थित केले. “भाजपाचे लोक इंडिया आघाडीला प्रश्न विचारतात की, तुमचा पंतप्रधान कोण असणार? पण मी भाजपाला प्रश्न विचारतो की, तुमचा पंतप्रधान कोण असणार? मोदी पुढच्या वर्षी १७ सप्टेंबर रोजी ७५ वर्षांचे होत आहेत. मोदी यांनी स्वतःच २०१४ रोजी नियम लागू केला होता की, जो नेता ७५ वर्षांचा होईल त्याला निवृत्त केले जाईल. त्यांनी सर्वात आधी आडवाणींना, मुरली मनोहर जोशी, यशवंत सिन्हा, सुमित्रा महाजन यांना निवृत्त केले गेले. मग आता मोदींच्या निवृत्तीची वेळ आली आहे. त्यामुळे भाजपानेच सांगावे की, त्यांचा पंतप्रधान कोण असणार?”, असा सवाल अरविंद केजरीवाल यांनी उपस्थित केला.