पंजाब निवडणुकीसाठी काँग्रेसने कंबर कसली असून युद्धपातळीवर निवडणुकीचे नियोजन केले जात आहे. याचाच एक भाग म्हणून निवडणुक प्रचारासाठी ३० जणांची ‘स्टार प्रचारक’ (star campaigners list) यादी जाहीर करण्यात आली आहे. यामध्ये पंजाबमधील आनंदपूर साहीब या लोकसभा मतदार संघाचे खासदार आणि काँग्रेसच्या कोर ग्रुपमधील नेते म्हणून ओळख असेलल्या मनिष तिवारी (Manish Tewari) यांना स्थान देण्यात आलेले नाही. या यादीत सोनिया गांधी, मनमोहन सिंग, प्रियंका गांधी, राहुल गांधी यांच्यासह राजस्थानमध्ये बंडाचा झेंडा फडकवणाऱ्या सचिन पायलट यांनाही स्थान देण्यात आलं आहे.
याआधीच पंजाबमधील निवडणुक निर्णय प्रक्रियेतून मनिष तिवारी यांना अप्रत्यक्षपणे दूर ठेवण्यात आले होते. त्यात आता निवडणुक प्रचारातील मुख्य फळीतूनही वगळण्यात आले आहे, त्यामुळे पंजाब निवडणुकीत तिवारी यांना त्यांच्या लोकसभा मतदार संघापूरते मर्यादीत ठेण्यात आल्याचं स्पष्ट झालं आहे.
स्टार प्रचारकांच्या यादीमध्ये नाव नसल्याबद्दल थेट प्रतिक्रिया मनिष तिवारी यांनी दिलेली नाही. मात्र तिवारी यांनी माजी राष्ट्रपती प्रणव मुखर्जी यांचे पुत्र आणि सध्याचे तृणमुल काँग्रेसचे सदस्य असलेल्या माजी खासदार अभिजीत मुखर्जी यांच्या ट्वीटवर प्रतिक्रिया दिली आहे. अभिजित मुखर्जी यांनी मनिष तिवारी यांचे नाव प्रचारकांच्या यादीतून वगळल्याबद्द्ल नाराजी व्यक्त करत काँग्रेसचा कारभारबद्दल प्रश्नचिन्ह उपस्थित केले आहे. तेव्हा जर माझे नाव यादीत असते तर जास्त आश्चर्य वाटले असते अशी प्रतिक्रिया अभिजीत मुखर्जी यांच्या ट्वीटवर मनिष तिवारी यांनी दिली आहे.
काही महिन्यांपूर्वी काँग्रेस अध्यक्ष निवडीबाबत आणि संघटनेच्या कामकाजाबद्द्ल काही प्रश्न काँग्रेसमधील एका गटाने सोनिया गांधी यांना पत्र लिहित उपस्थित केले होते. या गटाला जी-२३ नावाने ओळखले जात आहे. या गटावर काँग्रेसच्या काही नेत्यांनी उघडपणे टीकाही केली होती. या गटामध्ये मनिष तिवारी सहभागी होते. निवडणुक प्रक्रियेपासून मनिष तिवारी यांना दूर ठेवत एकप्रकारे काँग्रेस श्रेष्ठींनी जी -२३ गटातील काही लोकांबद्द्ल नाराजी स्पष्टपणे दाखवून दिली आहे.
