Sharad Pawar: “मी बोलायला लागलो की पाऊस येतो आणि निकाल…”, शरद पवारांचं सूचक विधान; पावसातल्या ‘त्या’ सभेची पुन्हा चर्चा!

काय म्हणाले शरद पवार?

शरद पवारांनी यावेळी इचलकरंजीचे राष्ट्रवादी काँग्रेस (शरद पवार) पक्षाचे उमेदवार मदनराव कारंडे व शिरोळमधील उमेदवार गणपतरावजी पाटील यांच्यासाठी एकत्रित सभा घेतली. यावेळी बोलताना शरद पवारांनी सध्याची निवडणूक ही महाराष्ट्राचं भवितव्य ठरवणारी असेल, अशी प्रतिक्रिया दिली.

“मला आनंद आहे की, आज इचलकरंजी मतदारसंघातून मदनराव कारंडे, हातकणंगलेमधून राजू आवळे, शिरोळमधून गणपतरावजी पाटील यांची आज एकत्रित प्रचारसभा पार पडली. ही निवडणूक महाराष्ट्राचे भवितव्य ठरवणारी निवडणूक आहे. त्याच्यामध्ये माझा आणि जाहीर सभेचा आणि पावसाचा काहीतरी संबंध आहे. महाराष्ट्रामध्ये अनेक वेळेला मी बोलायला उभा राहिलो की, पावसाची सुरुवात होते. हे याआधीही अनेकदा झालं आहे की मी बोलायला सुरुवात केली की पावसाला सुरुवात होते आणि अशा वेळी निवडणुकीचे निकाल चांगले लागतात. यावेळीही तुम्हा सर्वांना हे ठरवावं लागेल की महाराष्ट्राचं सरकार कुणाच्या हाती सोपवायचं आहे”, असं शरद पवार म्हणाले.

“राज्याचा कारभार कुणाला सोपवायचा याचा निर्णय घ्या”

“मध्यंतरी देशाच्या लोकसभेची निवडणूक झाली, आता विधानसभेची निवडणूक आहे. या निवडणुकीमध्ये महाराष्ट्राचा कारभार कोणाच्या हातामध्ये द्यायचा? याचा निकाल आपल्या सगळ्यांना घ्यायचा आहे. ज्यांच्या हातामध्ये आपण महाराष्ट्राची सत्ता दिली त्यांचा पाच वर्षांचा अनुभव बघितला तर आज इथे सत्तेमध्ये बदल केल्याशिवाय पर्याय आपल्या सगळ्यांसमोर नाही”, असंही आवाहन शरद पवारांनी यावेळी उपस्थितांना केलं.

Sharad Pawar : अजित पवारांचा शिंदेंना दम? शरद पवारांकडून भर सभेत मिमिक्री; म्हणाले, “शिंदेंनी मला विनंती केली, समजून घ्या…”

याशिवाय पुन्हा एकदा पावसाचा उल्लेख करत शरद पवारांनी उपस्थितांचे आभारदेखील मानले. “भर पावसात तुम्ही इथे आलात, आमची भूमिका समजून घेण्याची तयारी दाखवली. त्यासाठी तुमचे धन्यवाद देतो”, असं ते भाषणाच्या शेवटी म्हणाले. शरद पवारांनी या सभेतील भाषणाचा उतारा त्यांच्या अधिकृत एक्स हँडलवर शेअर केला आहे.