Sreejaya Chavan : विधानसभा निवडणुकांसाठी (VidhanSabha Election) भाजपाकडून (BJP) पहिली यादी जाहीर करण्यात आली आहे. या यादीमध्ये ९९ उमेदवारांची नावं जाहीर करण्यात आली असून १३ महिलांना भाजपाकडून संधी देण्यात आली आहे. यामध्ये अशोक चव्हाण यांची लेक श्रीजया अशोक चव्हाण ( Sreejaya Chavan ) यांनाही पक्षाकडून संधी देण्यात आली आहे. श्रीजया चव्हाण ( Sreejaya Chavan ) यांना भोकर मतदारसंघातून विधानसभेच्या रिंगणात उतरवण्याचा निर्णय पक्षाकडून घेण्यात आला आहे.
श्रीजया यांना उमेदवारी मिळताच काय म्हणाले अशोक चव्हाण?
श्रीजया चव्हाण ( Sreejaya Chavan ) यांना भोकर मतदारसंघातून संधी देण्यात आली आहे. लेकीला उमेदवारी जाहीर झाल्यानंतर भाजपचे खासदार आणि श्रीजया यांचे वडील अशोक चव्हाण यांनी एबीपी माझाला प्रतिक्रिया दिली. त्यांनी म्हटलं की, श्रीजयाची ही पहिलीच निवडणूक आहे. मला आनंद आहे की ती आतापर्यंत सामाजिक,राजकीय क्षेत्रात काम करत होती, पण आता विधानसभेच्या दृष्टीकोनातून जनमानसाची सेवा करण्याच्या उद्देशाने ती ही निवडणूक लढवेल. जनमानसाची साथही तिला या निवडणुकीसाठी मिळेल. याआधीही ती या मतदारसंघात चांगलं काम करत होती आणि आता उमेदवार या नात्याने तिला काम करायला अधिक बळ मिळेल. मला खात्री आहे, जो मतदारसंघ मी इतकी वर्ष सांभाळला आणि जोपासला तो ती नक्कीच चांगल्या पद्धतीने सांभाळेल.
अशोक चव्हाण लोकसभा निवडणुकीच्या तोंडावर भाजपात
लोकसभा निवडणुकीच्या तोंडावर माजी मुख्यमंत्री अशोक चव्हाण हे भाजपात गेले. भोकर मतदार संघातून खासदार अशोक चव्हाण यांच्या कन्या श्रीजया चव्हाण ( Sreejaya Chavan ) यांना भाजपाची उमेदवारी जाहीर झाली आहे. अशोक चव्हाण यांनी आमदारकीचा राजीनामा देत भाजप मध्ये प्रवेश केला होता. भोकर अशोक चव्हाण यांचा पारंपारिक मतदार संघ आहे. आपल्या मुलीला निवडून आणणे अशोक चव्हाण यांच्यासाठी अत्यंत प्रतिष्ठेचे आहे. कारण अशोक चव्हाण भाजपामध्ये आल्यानंतरही नांदेड लोकसभा भाजपला गमवावी लागली होती.
श्रीजया अशोक चव्हाण कोण आहेत?
श्रीजया चव्हाण ( Sreejaya Chavan ) या माजी मुख्यमंत्री आणि भाजपाचे नेते अशोक चव्हाण यांच्या कन्या आहेत. त्या पेशाने वकील आहेत. तसंच भाजपाने तिकिट देण्याआधी भाजपा युवा मोर्चाचं काम करत आहेत. भाजयुमोने विकसित महाराष्ट्रासाठी आयडिया हा कार्यक्रम त्यांनी सुरु केला आहे. मुदखेड या ठिकाणी झालेल्या या कार्यक्रमात त्या सहभागी झाल्या होत्या. भारत जोडो अभियानाच्या राहुल गांधी यांच्या स्वागताच्या प्रत्येक बॅनरवर श्रीजयाचा फोटो झळकले होते. तेव्हापासूनच श्रीजया चव्हाण आगामी विधानसभा निवडणुक लढविणार असल्याची चर्चा रंगली होती. मागील काही महिन्यांपासून श्रीजया चव्हाण या राजकारणात अधिक सक्रिय झाल्याचे दिसले. त्या अनेक कार्यक्रमांना हजेरी लावत आहेत. जनतेच्या आणि कार्यकर्त्यांच्या भेटीगाठी घेत आहेत. भोकरमधून कन्या श्रीजया चव्हाण ( Sreejaya Chavan ) या विधानसभेच्या संभाव्य उमेदवार असतील हे लक्षात घेवून चव्हाण यांनी देखील मतदारसंघ पिंजून काढला होता. आता त्याचा किती फायदा होते ते कळेल. दरम्यान मतदार संघात श्रीजया चव्हाण ( Sreejaya Chavan ) यांचे भावी आमदार म्हणून बॅनरही झळकले होते. आता भाजपाने त्यांनी भोकरमधून संधी दिली आहे. त्या निवडून येणार की नाही हे पाहणं महत्त्वाचं असणार आहे.
