Mulund Assembly Constituency : गुजराती-मराठी वादात कोण मारणार बाजी? भाजपाच्या गडाला मविआ लावणार का सुरुंग?

१९९० सालापासून भाजपाने मुलुंड विधानसभा मतदारसंघात पक्षाची छाप पाडली आहे. १९९९ पासून २०१९ पर्यंत सरदार तारासिंह आमदार होते. परंतु, २०१९ च्या विधानसभा निवडणुकीवेळी त्यांच्या प्रकृती अस्वास्थामुळे ही जागा मिहिर कोटेचा यांना देण्यात आली. मिहिर कोटेचा यांनीही ही जागा काबिज केली. दरम्यान, २०२० साली सरदार तारासिंह यांचं निधन झालं. परंतु, मुलुंड परिसरात सरदार तारासिंग यांचं मोठं नाव होतं. लहान मोठ्या कामात तारासिंह सहभागी असायचे. अरुंद रस्ते, सार्वजनिक आरोग्याच्या सुविधा, उद्यानांची विकासकामांमध्ये तारासिंह यांनी मोलाचं योगदान दिलंय. त्याचाच फायदा मिहिर कोटेचा यांना झाल्याचं येथील राजकीय तज्ज्ञ सांगतात. मुंबईचं प्रवेशद्वार असलेल्या या मतदारसंघात उच्चभ्रू, मध्यम आणि गरीब कुटुंबाची संमिश्र वस्ती आहे. गुजराती, मराठी आणि उत्तर भारतीय अशी बहुभाषिक लोक येथे सर्वाधिक राहतात.

हेही वाचा >> Thane City Vidhan Sabha Constituency : शिवसेनेच्या बालेकिल्ल्यात भाजपाचा आमदार; नवं राजकीय समीकरण कोणाच्या पथ्यावर?

गुजराती-मराठी वादात कोण जिंकणार?

मुलुंडमध्ये गुजरात आणि मराठी असा भाषिक वाद गेल्या अनेक वर्षांपासून आहे. त्यामुळे भाजपाच्या मिहिर कोटेचा यांना उमेदवारी मिळाली तर विरोधकांना मराठी चेहरा उभा करण्याची गरज आहे. परंतु, या जागेवरून काँग्रेसने दावा केला असून चरणसिंंग सप्रा आणि राकेश शेट्टी यांच्या नावाची चर्चा आहे. त्यामुळे गुजराती-मराठी वादात इतर भाषिक उमेदवारांना संधी दिल्यास येथे अधिक कडवी लढत होण्याची शक्यता आहे. तसंच, मराठी मतांसाठी शिवसेनेला (उद्धव ठाकरे) ही जागा मिळाल्यास त्यांना उमेदवार आयात करावा लागणार आहे. महाराष्ट्र नवनिर्माण सेनेकडूनही या मतदारसंघासाठी चाचपणी सुरू आहे. समजा, महाविकास आघाडीने मराठी चेहरा उभा केला तर भाजपाकडेही दोन मराठी चेहरे रांगेत. प्रभाकर शिंदे आणि प्रकाश गंगाधरे यांच्याही नावाची चर्चा सुरू झाली आहे.

२०१९ च्या निवडणुकीत मिहिर कोटेचा यांना ८७ हजार २५३ मते, मनसेच्या हर्षला चव्हाण यांना २९ हजार ९०५ आणि काँग्रेसच्या गोविंद सिंग यांना २३ हजार ८५४ मते मिळाली होती.

राष्ट्रवादी विरोधात भाजपा

मुलुंड विधानसभा निवडणुकीसाठी राष्ट्रवादी काँग्रेस (शरद पवार) पक्षाच्या संगिता वाजे यांना उमेदवारी देण्यात आली आहे. तर, महायुतीकडून भाजपाच्या मिहीर कोटेचा यांना निवडणुकीच्या रिंगणात उतरवण्यात आलं आहे.

ताजी अपडेट

मुलुंड, भांडुप, कांजुरमार्ग, विक्रोळी, पवई, घाटकोपर, माहीम आदी भागातील अनेक मतदान केंद्रांमध्ये दुपारपर्यंत मतदानाचे प्रमाण २५-२७ टक्क्यांपर्यंत होते. शिवसेना शिंदे व ठाकरे गट, भाजप आदी पक्षांच्या मतदान केंद्रांजवळील टेबलांवर कार्यकर्त्यांची उपस्थिती होती. मात्र बहुतांश मतदारांना ऑनलाईन पद्धतीने आणि उमेदवारांकडून आधीच मतदान केंद्र, यादी क्रमांक आदी तपशील मिळाला असल्याने या टेबलांवरही मतदारांची गर्दी फारशी नव्हती.

नवीन अपडेट

मुलुंड विधानसभा मतदारसंघात भाजपाच्या मीहिर कोटेचा यांचा १ लाख ३१ हजार ५४९ मतांनी विजय झाला आहे. तसंच, त्यांच्याविरोधात राष्ट्रवादी काँग्रेस पक्षाचे राकेश शेट्टी यांचा ९० हजारांच्या फरकाने पराभव झाला आहे.

व