Patan Assembly Constituency: पाटण विधानसभेत पुन्हा एकदा शंभूराज देसाईंचा पुन्हा एकदा विजय; उद्धव ठाकरेंची सभा व्यर्थ

साताऱ्यातील पाटण विधानसभा मतदारसंघात शिवसेना (शिंदे) पक्षाच्या शंभूराज देसाई यांनी पुन्हा एकदा मोठा विजय प्राप्त केला आहे. त्यांनी तब्बल १,२५,७५९ मते मिळवली. अपक्ष उमेदवार आणि पारंपरिक प्रतिस्पर्धी सत्यजीत पाटणकर यांचा त्यांनी ३४,८२४ मतांनी पराभव केला. तर मविआचे अधिकृत उमेदवार आणि शिवसेना (ठाकरे) पक्षाचे नेते हर्षद कदम यांना केवळ ९६२६ एवढीच मते मिळू शकली.

पाटण विधानसभेचा राजकीय इतिहास

पाटण विधानसभेचे राजकारण देसाई आणि पाटणकर या दोन घराण्यांभोवती फिरत आले आहे. १९५१ ते १९८० या काळात तब्बल तीन वर्ष आणि लागोपाठ सात निवडणुकांमध्ये दौलतराव श्रीपतराव देसाई यांनी पाटण विधानसभेचे प्रतिनिधित्व केले होते. १९७८ ला त्यांनी जनता पक्षातून निवडणूक लढविली होती. बाकी सहावेळा ते काँग्रेसचे उमेदवार होते. १९८३ साली पोटनिवडणुकीत विक्रमसिंह रणजीतसिंह पाटणकर यांनी काँग्रेसच्या तिकीटावर येथे विजय मिळविला. त्यानंतर १९८५ ते १९९९ पर्यंत सलग चारवेळा विक्रमसिंह विजयी झाले. १९९९ साली त्यांनी शरद पवारांची साथ देऊन राष्ट्रवादीतर्फे निवडणूक लढविली होती.

हे वाचा >> Karad South Assembly Constituency: कराड दक्षिणमध्ये पृथ्वीराज चव्हाण हॅटट्रिक साधणार की भाजपा झेंडा रोवणार?

पुढे २००४ साली शंभूराज देसाई यांचा राजकीय उदय झाला. शिवसेनेकडून निवडणूक लढवत असताना त्यांनी विजय मिळविला. पुढच्याच निवडणुकीत म्हणजे २००९ साली पुन्हा एकदा राष्ट्रवादीचे विक्रमसिंह पाटणकर विजयी झाले. तर त्यानंतर मात्र २०१४ आणि २०१९ साली शंभूराज देसाई यांचे पाटणवर वर्चस्व राहिले.

शंभूराज देसाई यांच्याविरोधात उमेदवार कोण?

पाटण तालुक्यात देसाई आणि पाटणकर हे पारंपरिक प्रतिस्पर्धी राहिले आहेत. त्यामुळे इतर तुल्यबळ उमेदवार कोण? याची चर्चा होत आहे. शंभूराज देसाई यांनी बंडखोरी केल्यानंतर शिवसेना (उद्धव ठाकरे) पक्षाचे तरूण नेते हर्षद कदम हे त्यांच्याविरोधात आक्रमक होताना दिसत आहते. हर्षद कदम यांनी पक्षातील मोठ्या नेत्यांना पाटण तालुक्यात आणून शक्तीप्रदर्शन केले आहे. तसेच देसाईंच्या कारभाराविरोधात ते सातत्याने टीका करत असतात. मध्यंतरी त्यांनी देसाईंच्या भ्रष्टाचाराविरोधात मोर्चा काढला होता, या मोर्चाचा विरोध करण्यासाठी देसाईंच्या कार्यकर्त्यांनीही प्रतिमोर्चा काढला.

हर्षद कदम यांच्याइतका आक्रमकपणा सत्यजीत विक्रमसिंह पाटणकर हे दाखवत नाहीत, त्यांच्या राजकारणाची पद्धत वेगळी राहिली आहे. मात्र हा मतदारसंघ याहीवेळेस राष्ट्रवादी काँग्रेसने आपल्याकडे खेचून आणला तर त्यांच्याकडून उमेदवार कोण असले हे अद्याप सांगता येत नाही. पण सत्यजीत पाटणकर यांना उमेदवारी मिळाल्यास आणि हर्षद कदम यांनी त्यांची उत्तम साथ दिल्यास देसाई यांच्यासाठी निवडणूक सोपी राहणार नाही.

२०१९ च्या विधानसभेचा निकाल

१) शंभूराज देसाई (शिवेसना) – १,०२,२६६

२) सत्यजीत विक्रमसिंह पाटणकर (राष्ट्रवादी) – ९२,०९१

पाटण विधानसभेचे उमेदवार कोण?

पाटण विधानसभेतून एकूण ३१ अर्ज दाखल झाले होते, त्यापैकी २६ जणांचे अर्ज पात्र ठरले आहेत. शिवसेना (एकनाथ शिंदे) पक्षाकडून शंभूराज देसाई, शिवसेना (उद्धव ठाकरे) पक्षाकडून भानुप्रताप मोहनराव कदम, तर राष्ट्रवादी काँग्रेस (शरद पवार) पक्षाचे नेते सत्यजीत पाटणकर यांनी अपक्ष अर्ज दाखल केला आहे.

ताजी अपडेट

पाटणमध्ये शंभूराज देसाई यांच्या विरोधात शिवसेना (ठाकरे) आणि राष्ट्रवादी काँग्रेस (शरद पवार) पक्ष एकवटले आहेत. प्रचारात उद्धव ठाकरे यांनी शंभूराज देसाई यांच्यावर जोरदार टीका केली. “शिवसेनेने मंत्री केले तेव्हा शिवसेनेत. आता गद्दारांनी मंत्री केले म्हणून तिकडे गेले. जो करेल मला मंत्री, त्याचा होणार मी वाजंत्री. आता बस वाजंत्री वाजवत. सत्ता आल्यावर यांची सगळी प्रकरणे बाहेर काढणार”, असा इशारा उद्धव ठाकरे यांनी पाटण येथील सभेत दिला. तसेच देसाई यांनी मुलाच्या लग्नाचा खर्च सरकारी तिजोरीतून केला, असाही एक आरोप केला. या आरोपांना प्रत्युत्तर देताना शंभूराज देसाई यांनीही उद्धव ठाकरेंवर टीका केली.

मी गद्दार नसून बाळासाहेब ठाकरे यांच्याच शिवसेनेत आहे. त्यांचे धनुष्यबाण हीच माझी निशाणी आहे. तसेच उद्धव ठाकरे यांच्याकडे पाटणच्या विकासाचे कोमतेही व्हिजन नसल्यामुळे त्यांनी माझ्यावर वैयक्तिक टीका केली, असे शंभूराज देसाई म्हणाले.

दुसरीकडे राष्ट्रवादी काँग्रेस (शरद पवार) पक्षाचे उमेदवार सत्यजीत पाटणकर यांचाही जोरात प्रचार सुरू आहे. साताऱ्यातील सर्व जागा निवडून आणण्यासाठी शरद पवार यांनी प्रचारावर जोर दिला.

मतदानाच्या दिवशी काय झाले?

पाटण विधानसभा मतदारसंघ हा सातारा जिल्ह्यात येतो. सातारा जिल्ह्यात ६४.१६ टक्के मतदान झाले. तर पाटण विधानसभा मतदारसंघात ७५ टक्के मतदान झाले.