बॉलीवूडचा सुपरस्टार शाहरुख खान जेव्हा एखाद्या चित्रपटाची घोषणा करतो तेव्हा चाहत्यांमध्ये उत्साह संचारतो. त्याचप्रमाणे जेव्हा राजकुमार हिरानी त्यांचा चित्रपट घेऊन येत आहेत असे कळते, तेव्हाही चाहते आनंदी होतात. दोघांनी एकत्र चित्रपटाची घोषणा केली असेल तर काय होईल कल्पना करा! हे आता खरे होणार आहे कारण शाहरुखने एका चित्रपटाची घोषणा केली आहे, ज्याचे दिग्दर्शन राजकुमार हिरानी करणार आहेत.
शाहरुख खान आणि चित्रपट निर्माता राजकुमार हिरानी यांचा पहिला चित्रपट ‘डंकी’ २२ डिसेंबर २०२३ रोजी प्रदर्शित होणार आहे. हिरानींच्या चित्रपटात शाहरुख पहिल्यांदाच नायकाची भूमिका करत आहे. याआधी चित्रपट निर्मात्याने आमिर खान, संजय दत्त, रणबीर कपूर यांसारख्या सुपरस्टार्ससह ब्लॉकबस्टर चित्रपट दिले आहेत.
निर्मात्यांनी घोषणा करण्यासाठी सोशल मीडियावर एक लहान विनोदी व्हिडिओ प्रसारित केला होता. या घोषणेने चाहत्यांमध्ये उत्साह निर्माण केला असला तरी चित्रपटाचा विषय काय आहे याची उत्सुकताही वाढली आहे. शाहरुखनेही ट्विट करून आपल्या चित्रपटाची घोषणा केली आहे.
“प्रिय राजकुमार हिरानी सर, तुम्ही माझे सांताक्लॉज आहात. तुम्ही सुरुवात करा, मी वेळेवर पोहोचेन. खरे तर मी फक्त सेटवरच राहणार आहे. शेवटी तुमच्यासोबत काम करण्यासाठी मी उत्साहित आहे. मी तुमच्यासाठी २२ डिसेंबर २०२३ रोजी थिएटरमध्ये ‘डंकी’ घेऊन येत आहे,” असे शाहरुखने आपल्या ट्विटमध्ये म्हटले आहे.
जवळपास चार वर्षांपासून शाहरुखचा एकही चित्रपट आलेला नाही आणि आता चित्रपटावर चित्रपटाची घोषणा करत आहे. यशराज प्रॉडक्शनमध्ये ‘पठाण’ बनत आहे. त्यानंतर अॅटली यांनी दिग्दर्शित केलेल्या चित्रपटाचे शूटिंग सुरू आहे आणि आता राजू हिरानींच्या ‘डंकी’ची घोषणा करण्यात आली आहे.
शाहरुख खान आणि राजकुमार हिरानी पहिल्यांदाच ‘डंकी’मध्ये एकत्र काम करणार आहेत. राजकुमार हिरानींच्या ‘मुन्नाभाई एमबीबीएस’ या चित्रपटासाठी आधी शाहरुख खानकडे विचारणा करण्यात आली होती. पण काही कारणांमुळे काम झाले नाही आणि हा चित्रपट संजय दत्तच्या हातात आला. त्यानंतर आता पुन्हा एकदा डंकीच्या माध्यमातून शाहरुखला हिरानींसोबत काम करता येणार आहे. काही वृत्तांनुसार ही स्थलांतरितांच्या मुद्द्यावर भाष्य करणारी कथा असेल.
‘डंकी’ काय आहे?
हा चित्रपट ‘डंकी फ्लाइट’ या लोकप्रिय विषयावर आधारित असेल. जेव्हा एखादी व्यक्ती कायदेशीररित्या दुसऱ्या देशात जाऊ शकत नाही, तेव्हा तो अवैध मार्ग वापरतो. जेणेकरून तुम्हाला तुमच्या आवडत्या देशात प्रवेश मिळू शकेल. ही गोष्ट भारतातही खूप लोकप्रिय आहे. त्याच्या मदतीने अनेक तरुण कॅनडा आणि अमेरिकेत स्थलांतरित होतात. डंकी फ्लाइट चित्रपटाबद्दल आलेल्या टीझरमध्येही थोडी झलक दाखवण्यात आली आहे. यामध्ये एका वाळवंटात, काही लोक पाठीवर पिशव्या घेऊन ओळीतून चालत आहेत आणि एक विमान डोक्यावरून जात आहे.
या व्हिडिओमध्ये शाहरुख हिरानींशी बोलताना रणबीर कपूरकडे ‘संजू’ असल्याचं सांगतो. आमिरकडे ‘पीके’ आणि संजू बाबाचा ‘मुन्नाभाई एमबीबीएस’ आहे. सर, माझ्यासाठीही काही आहे का? असा प्रश्न विचारतो. त्यावर राजू हिरानी माझ्याकडे एक कॉमेडी स्क्रिप्ट आहे, असे सांगतात.
राजू हिरानी यांनीही ट्विट करून शाहरुखसोबत काम केल्याबद्दल आनंद व्यक्त केला. या चित्रपटात तापसी पन्नू देखील आहे. हिरानी यांनी त्यांच्या ट्विटमध्ये त्याचा उल्लेख केला आहे. राजकुमार हिरानी, अभिजात जोशी आणि कनिका धिल्लन यांनी या चित्रपटाचे लेखन केले आहे. हा चित्रपट जिओ स्टुडिओ, रेड चिलीज एंटरटेनमेंट आणि राजकुमार हिरानी फिल्म्स प्रस्तुत आहे. या एप्रिलमध्ये चित्रपटाचे पहिले शेड्यूल आणि पुढील शेड्यूल पंजाबमध्ये शूट केले जात आहे.