पाकिस्तानस्थित दहशतवाद्यांना जागतिक दहशतवादी म्हणून घोषित करण्याच्या भारत आणि अमेरिकेच्या प्रयत्नांना गेल्या दोन दिवसात दुसऱ्यांदा चीनने आडकाठी केली आहे. लष्कर-ए-तोयबाचा म्होरक्या हाफिज सईद याचा मुलगा हाफिज तलाह सईद याला दहशतवाद्यांच्या काळ्या यादीत टाकण्याचा प्रस्ताव भारत आणि अमेरिकेने संयुक्त राष्ट्राच्या परिषदेत ठेवला होता. हा प्रस्ताव तांत्रिक कारण देत चीनने स्थगित केला आहे. विशेष म्हणजे एक दिवसाआधीच चीनने संयुक्त राष्ट्रात लष्कर-ए-तोयबाचा (एलईटी) दहशतवादी शाहीद महमूद याला जागतिक दहशतवादी म्हणून घोषित करण्याचा प्रस्ताव रोखला आहे. त्यानंतर आता पुन्हा चीन दहशतवाद्यांची पाठराखण करताना दिसत आहे. ‘१२६७ अल कायदा प्रतिबंध समिती’च्या नियमांनुसार दहशतवाद्यांना काळ्या यादीत टाकण्यास चीनने गेल्या चार महिन्यात पाचव्यांदा विरोध दर्शवला आहे. यानिमित्त चला जाणून घेऊयात कोण आहे शाहीद मेहमूद? जागतिक दहशतवादात त्याची भूमिका काय आहे?
शाहीद मेहमूद हा लष्कर ए तोयबाचा दहशतवादी आहे. त्याने लष्कर ए तोयबा आणि जमात-उद-दावाचा प्रमुख हाफिज सईद आणि संयुक्त राष्ट्राने घोषित केलेला जागतिक दहशतवादी हाफिज सईदसोबत मिळून भारतात दहशतवाद्यांची ठिकाणं तयार केली आणि त्यांच्या विषयी सहानुभूती निर्माण करण्याचा कट रचला. धार्मिक कार्य आणि दानधर्माच्या नावाखाली भारतात पैसे पाठवले, हा पैसा नंतर भारताविरुद्ध दहशतवादी कारवायांसाठी वापरला गेला.
फलाह-ए-इन्सानियत टेरर फंडिंग प्रकरणातील आरोपी –
शाहीद महमूद विरोधात एनआयएने दिल्लीत गुन्हा दाखल केला आहे. हे प्रकरण फलाह-ए-इन्सानियत(FIF) टेरर फंडिंगचे आहे. FIF ला संयुक्त राष्ट्रांनी १४ मार्च २०१२ रोजी लष्कर ए तोयबाच्या वतीने काम करणारी दहशतवादी संघटना म्हणून घोषित केलं होतं. ऑक्टोबर २०२० मध्ये भारताने शाहिद महमूदचा यूएपीए १९६७ अंतर्गत वाँटेड दहशतवाद्यांच्या यादीत समावेश केला होता. शाहिद महमूद लष्कर ए तोयबाशी २००७ पासून जुडलेला आहे. जून २०१५ ते जून २०१६ पर्यंत तो एफआयएफचा उपाध्यक्ष होता. या अगोदर ऑगस्ट २०१३ तो लष्कर ए तोयबाचा प्रचारक होता.
जागतिक दहतवादी घोषित करण्यात चीनचा सतत अडथळा –
पाकिस्तानी दहशतवादी आणि संघटनांना जागतिक दहशतवादी म्हणून घोषत करण्यात चीनने अडथळा आणला आहे. . खरंतर चीनने संयुक्त राष्ट्र सुरक्षा परिषदेच्या १२६७ अलकायदा प्रतिबंध समिती अंतर्गत महमूदला जागतिक दहशतवादी म्हणून घोषित करण्याच्या भारत आणि अमेरिकेच्या प्रस्तावावर व्हेटो केला. अमेरिकेच्या अर्थ विभागाने डिसेंबर २०१६ मध्ये महमूदला जागतिक दहशतवादी म्हणून घोषित केले होते. या अगोदर पाकिस्तानी दहशतवादी अब्दुल रहमान मक्की, जैश-ए-मोहम्मदचा कमांडर अब्दुल रउफ, जैशचा नेता मौलानामसूद अझहर यांना जागतिक दहशतवादी म्हणून घोषित करण्यात चीनने अडथळे आणले आहेत.
