काही जगावेगळं घडलं की त्याची बातमी वाऱ्यासारखी पसरते. गेल्या आठवड्यात अशीच एक बातमी जगभर पसरली. एका चोरीची. बरं चोरी तरी कशाची? मौल्यवान रत्ने, जडजवाहिर, महागड्या गाड्या… नव्हे…. चोरांनी चक्क चीजवर डल्ला मारला होता. अर्थात हे चीज असे-तसे नाही. ते होते विशेष चेडर चीज.
चीज दरोडा कुठे?
लंडनमधील चीज स्पेशालिस्ट अशी ख्याती असलेल्या निल्स यार्ड डेरीतून थोडेथोडके नव्हे तर तब्बल २२ टनांहून अधिक चेडर चीज चोरीला गेले. चीजच्या चोरीला गेलेल्या ९५० चकत्यांची किंमत तब्बल तीन लाख डॉलर्स आहे. विशेष म्हणजे ही चोरीही अगदी सिनेमॅटिक पद्धतीने झाली. एका बड्या फ्रेंच किरकोळ विक्रेत्यासाठी घाऊक वितरक म्हणून काम करत असल्याचा दावा करत या चोरांनी हे चीज पळवले. हे टनांनी चीज रशिया किंवा मध्य आशियात नेल्याचा संशय व्यक्त होत आहे. २१ ऑक्टोबरला ही चोरीची घटना घडली.
ब्रिटन पोलिसांनी शोधमोहीम सुरू केली आहे. पोलीस चीजशी संबंध येऊ शकत असलेल्या संभाव्य लोकांपर्यंत पोहोचून तपास करत आहेत. सेलिब्रिटी, मोठमोठे शेफ, आंतरराष्ट्रीय अधिकाऱ्यांसोबत ही तपास मोहीम सुरू आहे. सेलिब्रिटी शेफ जेमी ऑलिव्हर यांनी समाज माध्यमांवर या चोरीविषयी लिहिताना टिप्पणी केली आहे की जगातलं सर्वोत्तमांपैकी असलेले चेडर चीज चोरी झाले आहे. हे महागडं चीज स्वस्तात विकले जात असताना कोणी पाहिले तर नक्की नजर तिरकी करा असे आवाहनही जेमी यांनी केले आहे. या डेरीच्या मालक सारा स्टुअर्ट यांना या चोरीनंतर लोक सांत्वनपर संदेश पाठवत आहेत. मदत देऊ करत आहेत. चीजचे पुरवठादार मदतीसाठी पुढे आले आहेत.
चेडर चीज म्हणजे काय?
पिझ्झा, सँडविच, बर्गर, मॅकरोनीप्रेमींना चेडर चीजची महती वेगळी सांगायला नको. पिझ्झावर विरघळून पसरून राहिलेले आणि पिझ्झा, सँडविचचा तुकडा उचलल्यावर ज्या चीजची नाजूक, लांब तारा बनतात ते चेडर चीज. किसलेले चेडर चीज जलद आणि सहज वितळते. यात प्रथिने, व्हिटॅमिन के २, ओमेगा 3 फॅटी ऍसिड भरपूर असते. तसेच हे चीज साठवण्यासाठी जास्त खर्च येतो, त्यामुळे हे महाग असते.
हेही वाचा >>>Donald Trump on Diwali: अमेरिकेतील हिंदूंनी भोगलेला धर्मद्वेषाचा इतिहास काय सांगतो?
चीजचं युरोपातील महत्त्व…
चेडर चीज हे जगातल्या चीजच्या प्रकारातील सर्वात पसंतीचे चीज आहे. चेडरला ८०० वर्षांची परंपरा आहे. ते अनेकविध प्रकार आणि चवींमध्ये येते.
१२ व्या शतकात चेडर नावाच्या गावात या चीजचा शोध लागला. यामागे एक आख्यायिकाही सांगितली जाते. एका गवळी महिलेने एकदा एका मोठ्या भांड्यातून दूध आणून एका गुहेत थंड करण्यासाठी ठेवले, पण नंतर ती ते तिथेच विसरून गेली. काही दिवसांनी ती पुन्हा गुहेकडे परतली तेव्हा ते दूध घट्ट झाले होते. तिने ते खाल्ले. बस… त्याच क्षणी चेडर चीजचा शोध लागला.
चेडर चीजच्या जन्मभूमीती महती
इंग्लंडमधील सॉमरसेटमधील चेडर हे दऱ्या आणि गुहा असलेले एक छोटे शहर आहे. या गुहांमधील विशिष्ट तापमान चेडर चीज तयार होण्यास पोषक असते. मूळतः स्थानिक शेतकऱ्यांनी बनवलेले, चेडर चीज त्याच्या दीर्घकाळ टिकण्याच्या गुणामुळे लोकप्रिय झाले, ज्यामुळे ते पुढे प्रवासी आणि सैनिकांसाठी एक आदर्श अन्न बनले.
