विश्लेषण: गुजरातमध्ये भाजपाला शिंगावर घेण्यासाठी ‘आप’नं निवडलेले इसूदनभाई गढवी कोण आहेत?

कसं ठरलं इसूदनभाई गढवींचं नाव?

गुजरातमध्येही केजरीवाल यांनी पंजाबप्रमाणेच लोकांकडून मुख्यमंत्री निवडीचं आवाहन केलं होतं. मोबाईल मेसेज, व्हॉट्सअॅप, व्हॉइस मेल आणि इमेल अशा सर्व माध्यमातून आपकडून नागरिकांना कोण मुख्यमंत्री हवेत? यासंदर्भात मत देण्याचं आवाहन केलं होतं. या सर्वेक्षणात जवळपास १६ लाख नागरिकांनी मतदान केल्याचं अरविंद केजरीवाल यांनी सांगितलं आहे. यापैकी ७३ टक्के नागरिकांनी गढवी मुख्यमंत्री म्हणून हवेत, असं मत दिल्याचं केजरीवाल यांनी सांगितलं आहे. मुख्यमंत्रीपदाच्या नावाची घोषणा केजरीवाल यांनी केल्यानंतर इसूदनभाई गढवी यांनी स्टेजवरून खाली उतरून त्यांच्या आईचे आशीर्वाद घेतले.

कधी होणार आहेत गुजरातमध्ये निवडणुकाय़

गेल्या आठवड्यात केंद्रीय निवडणूक आयोगाने हिमाचल प्रदेशमधील निवडणुकांच्या तारखा जाहीर केल्या. त्याचवेळी गुजरात विधानसभा निवडणुकांच्या तारखा जाहीर होणं अपेक्षित होतं. मात्र, तेव्हा तारखा जाहीर न झाल्यामुळे अनेकांच्या भुवया उंचावल्या होत्या. अखेर आता आयोगानं तारखा जाहीर केल्या असून येत्या १ आणि ५ डिसेंबर रोजी दोन टप्प्यांमध्ये गुजरातमध्ये मतदान होणार आहे. या निवडणुकांचा निकाल ८ डिसेंबर रोजी लागणार आहे.

विश्लेषण: इम्रान खान यांच्यावरील हल्ल्यानंतर बेनझीर भुट्टोंच्या सभेची चर्चा का होतेय? पाकिस्तानातील संघर्ष आणखी चिघळणार?

पत्रकारितेचं शिक्षण ते दूरदर्शनमधील नोकरी

इसूदनभाई गढवी यांचा जन्मह गुजरातच्या द्वारका जिल्ह्यातील पिपलिया गावात झाला. १० जानेवारी १९८२ रोजी जन्मलेल्या गढवींना ४०व्या वर्षी आपकडून मुख्यमंत्रीपदाची उमेदवारी मिळाली आहे. त्यांचा हा प्रवास आधी पत्रकारिता, नंतर चॅनल हेड आणि राजकीय पदार्पणाच्या दुसऱ्याच वर्षी मुख्यमंत्रीपदाची उमेदवारी असा झाला आहे. ओबीसी समाजातून आलेल्या गढवी यांनी गुजरात विद्यापीठातून २००५ साली त्यांची पत्रकारितेची पदव्युत्तर पदवी घेतली. त्यानंतर त्यांनी पत्रकारितेला सुरुवात केली.

दूरदर्शनपासून त्यांनी आपल्या पत्रकारितेच्या करिअरची सुरुवात केली. त्यानंतर २००७ साली त्यांनी इटीव्ही गुजरातीसाठी पत्रकारिता सुरू केली. २०१५ साली गढवींनी व्हीटीव्ही या गुजराती वृत्तवाहिनीवर अँकर म्हणून कारकिर्दीला सुरुवात केली. या काळात ते वाहिनीचे स्टार अँकर झाले. गुजरातमध्ये या वाहिनीच्या माध्यमातून ते जनमाणसात पोहोचले. २०२१ साली त्यांनी वाहिनीचे संपादक म्हणून राजीनामा दिला आणि आम आदमी पक्षात प्रवेश करून राजकीय विश्वात पदार्पण केलं.

१५० कोटींचा घोटाळा आणि वृत्तांकन!

ईटीव्ही गुजरातीमध्ये काम करताना गढवींनी गुजरातच्या डांग आणि कापराडा जिल्ह्यातील अवैध जंगलतोडीच्या घोटाळ्यावर केलेल्या वृत्तांकनाची जोरदार चर्चा झाली होती. तब्बल १५० कोटींच्या या घोटाळ्यावर त्यांनी केलेल्या सविस्तर वृत्तांकनामुळे हा घोटाळा उजेडात आला. यानंतर गुजरात सरकारने या प्रकरणी कारवाई केली. शेतकऱ्यांच्या समस्यांवर काम करताना त्यांनी केलेल्या वृत्तांकनामुळे ग्रामीण भागातून त्यांना चांगला पाठिंबा मिळू लागला आहे.

तिन्ही पक्षांकडून आल्या होत्या ऑफर्स!

इसूदनभाई गढवींनी २०२१मध्ये भाजपा, काँग्रेस आणि आम आदमी पार्टी अशा तिन्ही पक्षांकडून पक्षप्रवेशाची ऑफर देण्यात आली होती, असा दावा केला आहे. “मला लोकांसाठी काम करायचं होतं. त्यामुळे मी पत्रकारिता सोडली. भाजपा, काँग्रेस आणि आम आदमी पार्टी अशा तिन्ही पक्षांकडून मला पक्षप्रवेशासाठी आमंत्रण देण्यात आलं होतं. पण नंतर एक दिवस अरविंद केजरीवाल यांनी मला भेटायला बोलवलं. लोकांसाठी काम करायला मिळेल म्हणून मी आपमध्ये प्रवेश केला. आपमध्ये मी जे काम करतोय, त्यामध्ये मी समाधानी आहे. पक्षात कोणतेही मतभेद नाहीत”, असं गढवींनी इंडियन एक्स्प्रेसशी बोलताना सांगितलं.

विश्लेषण: मोरबी ‘झुलता पूल’ दुर्घटना म्हणजे ‘Act of God’? नेमका दावा काय? नियमात काय सांगितलंय?

‘आप’साठी पहिलं पाऊल!

इसूदनभाई गढवींच्या रुपात आम आदमी पक्षाला गुजरातमध्ये आल्यानंतर पहिली प्रभावशाली व्यक्ती गुजरातमध्ये मिळाली. गुजरातमधील भाजपाच्या २७ वर्षांच्या सत्तेला आव्हान देऊन त्यांना सत्तेतून पायउतार करण्याचं कठीण आव्हान आपसमोर आहे. त्यामुळे गढवींचाही निवडणुकीचा रस्ता कठीण असेल. मात्र, पंजाबप्रमाणेच गुजरातमध्येही प्रस्थापितांना धक्का देण्यात आप यशस्वी होणार की भाजपा आपला बालेकिल्ला राखणार? यावर आता राजकीय विश्लेषकांमध्ये जोरदार चर्चा सुरू झाली आहे.