खासदार,आमदारांनी इचलकरंजीत अधिकार्‍यांच्या बदल्यांचा खेळखंडोबा लावला आहे; सागर चाळके, प्रकाश मोरबाळे यांचा आरोप

महापालिकेचे आयुक्त ओमप्रकाश दिवटे यांचे अचानक बदली होऊन त्या ठिकाणी सातारा येथील पल्लवी पाटील यांची नियुक्ती झाली होती. दिवटे यांनी मॅट मध्ये धाव घेतल्यानंतर त्यांना या पदावर कायम ठेवले आहे . तर पाटील यांना पुन्हा सातारा येथे जिल्हा प्रशासन अधिकारी पदावर कार्यरत राहण्याचे आदेश दिले आहेत. यानंतर आता इचलकरंजीत राजकीय टिपा-टिपणीला सुरुवात झाली आहे. याबाबत बोलताना चाळके, मोरबाळे म्हणाले,कोल्हापूर रोडवरील यशवंत प्रोसेसच्या परिसरात बांधण्यात येत असलेल्या दुकानगाळ्यांसमोरील झाडे तोडण्यासाठी आमदार आवाडे हे आयुक्तांवर दबाव टाकत होते. त्यांना आयुक्तांनी नकार दिल्याने दुखावलेल्या आमदार पिता-पुत्रांनी दिवटे यांची बदली केल्याचा आरोप चाळके यांनी केला. पहिले आयुक्त देशमुख यांच्याशी बिनसल्याने खासदार माने यांनी त्यांची बदली केली. तर बेकायदेशीर कामांना नकार देणार्‍या दिवटे यांची बदली आमदार आवाडे यांनी केली.

हेही वाचा >>>ओमप्रकाश दिवटे हेच इचलकरंजी महापालिकेचे आयुक्त; पल्लवी पाटील यांच्या निवडीला स्थगिती

एकिकडे विकासाच्या गप्पा मारायच्या आणि दुसरीकडे कार्यक्षम अधिकार्‍यांच्या बदल्या करुन मर्जीतील अधिकार्‍यांना आणायचे हे बरोबर नाही. गेल्या पाच वर्षात इचलकरंजीतील एकही प्रश्‍न सुटलेला नाही. शहराचा पाण्याचा व वस्त्रोद्योगाचा प्रश्‍न अधिक गंभीर बनत आहे. या प्रश्‍नांवर आमदार आवाडे केवळ इचलकरंजीकरांची दिशाभूल करण्याचे काम करत आहेत. या प्रश्‍नांवर आम्ही स्वतंत्र बैठक घेणार असल्याचेही चाळके यांनी सांगितले. शहरातील पाण्याचा प्रश्‍न जटील बनला असताना तो सोडविण्यासाठी बैठक घेण्याऐवजी अधिकार्‍यांच्या बदल्या करण्यात गुंतले असल्याचा टोलाही त्यांनी लगावला. तर दिवटे हे मॅटमध्ये गेले असून त्यांच्या बाजूने निकाल लागावा म्हणजे अशा प्रवृत्तींना चपराक बसेल असेही ते म्हणाले.

हेही वाचा >>>आमिर खानचा मुलगा प्रदर्शनापूर्वी गाजू लागला; ‘महाराज’ चित्रपटावर बंदी घालण्यासाठी कोल्हापुरात आंदोलन

यशवंत प्रोसेस परिसरात उभारले जात असलेले दुकानगाळे हे बेकायदेशीर आहेत. औद्योगिक क्षेत्र असताना व्यापारी संकुल उभारताना त्यांनी रितसर परवानगी घेतली आहे का? याची तक्रार महापालिकेकडे केली असल्याचे मोरबाळे यांनी सांगितले. तर आगामी विधानसभा निवडणूकीत जनताच आवाडे यांना त्यांची जागा दाखवून देईल असेही ते म्हणाले.