राजकीय नेते मंडळींच्या दौऱ्यावर भाजपचे पक्ष चिन्ह असलेले गमछा विद्यार्थिनींच्या गळ्यात अडकवल्याचे प्रकार उघडकीस आला आहे. अशा स्थितीतील विद्यार्थिनींचा केंद्रीय मंत्री, खासदारांनी लेझीम नृत्य केल्याचा प्रकारही समाज माध्यमातून अग्रेषित झाला असून त्यावरून प्रश्न उपस्थित केले जात आहेत.
हेही वाचा >>> कोल्हापूर : वाघाची कातडी पांघरलेले गद्दार निघून गेलेत; संजय राऊत यांचा प्रहार
केंद्रीय नागरी हवाई उड्डाण मंत्री ज्योतिरादित्य शिंदे कोल्हापूर दौऱ्यावर आले असता त्यांनी बसर्गे (ता. चंदगड) येथे एका कार्यक्रमाला हजेरी लावली. त्यांच्यासमवेत राज्यसभा सदस्य धनंजय महाडिक, ग्रामीण जिल्हा अध्यक्ष समरजितसिंह घाटगे हेही होते.
त्यांच्या स्वागतासाठी कार्यकर्त्यांनी जोरदार तयारी केली होती. स्वागतासाठी उपस्थित विद्यार्थिनींच्या गळ्यात भाजपचे पक्ष चिन्ह असलेले गमछे घालून उभे करण्यात आले होते. मंत्री शिंदे, खासदार महाडिक यांचे आगमन झाल्यावर विद्यार्थिनींनी लेझीम नृत्य सुरू केले. यावेळी शिंदे, महाडिक यांनाही लेझीम नृत्य करण्याचा मोह आवरला नाही. तेही विद्यार्थिनी समवेत लेझीम खेळताना लेझीम खेळू लागले. या सर्व प्रकारचे चित्रीकरण करणारा व्हिडिओ समाज माध्यमांमध्ये अग्रेषित झाला आहे.
हेही वाचा >>> कोल्हापूर : सत्तेत आल्यानंतर शेतकऱ्यांच्या पाठीत काठी – राजू शेट्टी
त्यावरून उलट सुलट प्रश्न उपस्थित केले जात आहे. आजचे विद्यार्थी देशाचे उद्याचे भविष्य असतात. परंतु भाजपा शैक्षणिक संस्थाना राजकीय अड्डा बनवत आहे. पक्षाचा पट्टा गळ्यात अडकवून देशाच्या भविष्याचा हा प्रवास नेमका कुठल्या दिशेने चालू आहे? संयोजक एवं शाळेच्या मुख्याध्यापकांवर जिल्हा प्रशासनामार्फत कार्यवाही होईल का?,असे प्रश्न उपस्थित केले जात आहेत.
