कोल्हापूर जिल्हा बँक अपात्र कर्जमाफीचे व्याज भरणार; १४ हजार २९७ शेतकऱ्यांना लाभ – हसन मुश्रीफ

केंद्र सरकारने २००८ मध्ये थकबाकीदार शेतकऱ्यांना कर्जमाफी केली होती, पण लाभार्थीवरून तक्रार झाल्यानंतर नाबार्डने संपूर्ण कर्जमाफीची चौकशी केली. यामध्ये ४४ हजार ६५९ शेतकऱ्यांची ११२ कोटी ८९ लाखांची कर्जमाफी अपात्र ठरवली गेली. सर्वाेच्च न्यायालयात हे प्रकरण प्रलंबित असले, तरी बँकेच्या सर्वसाधारण सभेत अध्यक्ष मुश्रीफ यांनी घोषित केल्याप्रमाणे थकीत ६६ कोटी ६० लाख रुपयांवरील व्याज माफ करण्याचा निर्णय घेऊन शेतकऱ्यांना दिलासा दिला आहे.

दहा लाखांपर्यंत कर्ज

अपात्र ठरलेल्या या शेतकऱ्यांना आता दहा लाखांपर्यंत कर्जही मिळणार आहे. अपात्रतेच्या मुद्द्यावरून शेतकऱ्याची अडवणूक करू नये. आतापासून त्याची वसुली व रकमेवर व्याजही आकारता येणार नसल्याच्या सूचना विकास संस्थांना बँकेने दिल्या आहेत.

अनिष्ट दुराव्यातून सुटका

विकास संस्थांकडून वसूल करून घेतलेले व्याज ६६.६० कोटी रुपये बँकेच्या तरतुदीतून संस्थांना परत मिळणार आहे. यामुळे संस्थांचा संचित तोटा कमी होऊन त्या अनिष्ट दुराव्यात बाहेर पडण्याचा मार्ग मोकळा झाला आहे.

त्यांचेही पैसेही देणार

अपात्र कर्जमाफीचे प्रकरण सर्वोच्च न्यायालयात प्रलंबित आहे. त्याचा निकाल लागल्यानंतर कर्जमाफीची रक्कम परत केली, त्या ३० हजार २६२ शेतकऱ्यांना पैसे दिले जाणार आहेत. थकबाकी भरणा केलेला नाही, अशा शेतकऱ्यांसाठी एकरकमी परतफेड योजना राबवणार असल्याचे अध्यक्ष मुश्रीफ यांनी सांगितले.

शेतकऱ्यांना दिलासा

अपात्र कर्जमाफीबाबत लवकरच सर्वोच्च न्यायालयात निकाल अपेक्षित आहे. पण, विकास संस्था आणि ते शेतकरी अडचणीत आले होते. त्यामुळे संचालक मंडळाने थकीत रकमेवरील व्याज देण्याचा निर्णय घेतला असल्याने या शेतकऱ्यांना दिलासा मिळाला आहे. – हसन मुश्रीफ, अध्यक्ष, कोल्हापूर जिल्हा मध्यवर्ती सहकारी बँक

अपात्र कर्जमाफी आकडेवारीत-

जिल्ह्याला मिळालेली कर्जमाफी – २७९ कोटी, अपात्र कर्जमाफी – ११२ कोटी ८९ लाख, अपात्र शेतकरी – ४४ हजार ६५९,विकास संस्थांच्या पातळीवर वसुली – ४६ कोटी १७ लाख,वसूल केलेले शेतकरी – ३० हजार ३६२,थकबाकीदार शेतकरी – १४ हजार २९७,थकीत व्याज रक्कम – ६६ कोटी ६० लाख.