कोल्हापूर : दख्खनचा राजा जोतिबा देवाच्या दर्शनाला जात असताना आरोग्य मंत्री तानाजी सावंत यांच्या गाडीला रविवारी दुपारी अपघात घडला. कोल्हापूर – रत्नागिरी मार्गावर रजपुतवाडी येथे हा अपघात घडला. मंत्री सावंत हे सुखरूप असले तरी त्यांचे स्वीय सहाय्यक रविकांत जाधव हे किरकोळ जखमी झाले असून त्यांच्यावर उपचार करण्यात आले. आज गारगोटी (ता. भुदरगड) येथे शासकीय उपजिल्हा रुग्णालयाचे लोकार्पण सोहळा आयोजित केला होता, त्यास उपस्थित राहिल्यानंतर मंत्री सावंत यांनी कोल्हापूर करवीर निवासिनी महालक्ष्मीचे दर्शन घेतले.
त्यानंतर ते कोल्हापूर जवळील वाडी रत्नागिरी येथील जोतिबा देवाच्या दर्शनाला जात होते. रजपुतवाडी येथून त्यांच्या वाहनांचा ताफा जात होता. यावेळी मागील वाहनाने मंत्री सावंत यांच्या मोटारीस जोरदार धडक दिली. ती इतकी जोरदार होती की वाहनाच्या पुढच्या भागाचा चक्काचूर झाला होता. तरीही या अपघातात मंत्री सावंत हे सुखरूप राहिले. त्यांना कोणतीही इजा पोहोचली नाही. ते दुसऱ्या शासकीय वाहनाने जोतिबाकडे रवाना झाले. देवदर्शन घेऊन ते पुढे निघून गेल्याचे सूत्रांनी सांगितले. या अपघातात त्यांचे स्वीय सहाय्यक रविकांत जाधव किरकोळ जखमी झाले.
