कोल्हापूर: देवगड -कर्नाटकातील निपाणी या राज्य महामार्गावर सरवडे येथे ट्रक आणि मोटारची मध्यरात्री धडक झाली. या अपघातात राधानगरी तालुक्यातील सोळंकुर गावातील तीन युवक ठार झाले तर चौघेजण जखमी झाले. यामुळे सोळंकुर गावावर शोककळा पसरली आहे. शुभम चंद्रकांत धावरे, आकाश आनंदा परीट, रोहन संभाजी लोहार अशी मृत तरुणांची नावे आहेत. तर , ऋत्विक राजेंद्र पाटील, सौरभ सुरेश तेली, भरत धनाजी पाटील, संभाजी हणमंत लोहार हे जखमी झाले आहेत. हेही वाचा : हातकणंगलेत ताराराणी पक्षाच्या जयश्री कुरणे यांची उमेदवारी ऐन गणेशोत्सव काळात एकाच गावातील तीन तरुणांचा मृत्यू झाल्याने सोळंकुर गाव शोकसागरात बुडाले आहे. सरवडे - मांगेवाडी हद्दीतील सूर्यवंशी मळा येथे हा मध्यरात्री अपघात घडला. सरवडे येथील नदीच्या पश्चिम वळणावर दोन्ही वाहनांची धडक झाली. अपघातानंतर बेदरकारपणे वाहन चालवणारा ट्रक चालक पसार झाला. याप्रकरणी राधानगरी पोलीस ठाण्यामध्ये राजेंद्र मनोहर लोहार यांनी फिर्याद दाखल केली आहे.
