कोल्हापूर : पंचगंगा नदीला काळेकुट्ट दुर्गंधीयुक्त पाणी आले आहे. या दुषित पाण्याची पाहणी करण्यासाठी शिरोळ तालुक्यात आलेल्या प्रदुषण नियंत्रण मंडळाचे क्षेत्र अधिकारी सचिन हरबड यांना स्वाभिमानी संघटनेचे बंडू पाटील, विश्वास बालीघाटे यांनी दुषित पाणी पाजवण्याचा प्रयत्न केला. तर, मच्छिमार करणाऱ्या बागडी समाजाने चांगलेच धारेवर धरत नदी प्रदुषित करणाऱ्या घटकांवर कारवाई करण्याची मागणी केली. यावेळी अधिकारी हरबड यांनी दुषित पाण्याचे नमुने घेऊन वरीष्ठ अधिकाऱ्यांना अहवाल पाठविण्याचे आश्वासन दिले.
पंचगंगा नदीला मलयुक्त काळेकुट्ट पाणी आले असून नदीकाठी दुर्गंधी पसरली आहे. दुषित पाण्यामुळे पाण्याला फेस येत आहे. पाण्यातील ऑक्सिजनचे प्रमाण कमी झाल्याने मासे मृत्यूमुखी पडत आहेत. दुषित पाण्याची तक्रार स्वाभिमानीचे बंडू पाटील यांनी प्रदुषण नियंत्रण मंडळाकडे केल्याने गुरुवारी दुपारी हरबड तेरवाड बंधारा येथे आले होते. यावेळी पाटील, बालीघाटे यांच्यासह नदीकाठावरील रहिवासी, मच्छीमार करणारे बागडी समाज यांनी तीव्र भावना व्यक्त करत अधिकारी हरबड यांच्यावर प्रश्नांची सरबत्ती करत धारेवर धरले.
आणखी वाचा-कोल्हापूरात दोन वर्षात २१ मोबाईल टॉवर चोरीस; पोलिसात फिर्याद दाखल
हरबड यांनी इंचलकरंजी शहरातील मलयुक्त सांडपाणी असल्याचे सांगितल्याने महापालिकेच्या अधिकाऱ्यांना तेरवाड बंधारा येथे बोलावून घ्या व त्यांच्यावर कारवाई केल्याशिवाय येथून जावू देणार नाही अशी भूमिका घेत बंधाऱ्यावरच रोखून धरले. त्यामुळे काही काळ तणावाचे वातावरण निर्माण झाले होते. अधिकारी हरबड यांनी इंचलकरंजी महापालिकेच्या सांडपाणी प्रक्रिया प्रत्यक्षात पाहणी करुन कारवाईबाबात अहवाल तयार करण्याचे आश्वासन दिल्यानंतर त्यांची सुटका करण्यात आली.
