तिजोरी फुगली तरी, पायाभूत सुविधांसाठी मात्र तारांबळ कोल्हापूरची प्रगती होत असतानाच साडेतीन शक्तिपीठांपकी एक असलेल्या महालक्ष्मी मंदिरात येणाऱ्या भाविकांच्या गर्दीत दर वर्षी काही लाखांनी भर पडत आहे. कोल्हापूर शहर व उपनगरांना पायाभूत सुविधा पुरवताना महापालिकेची तारांबळ उडत असते. अशातच भाविकांच्या वाढत्या गर्दीला आवश्यक त्या सुविधा पुरवणे महापालिकेच्या कुवतीच्या बाहेर गेले आहे. महालक्ष्मी मंदिर विकास आराखडय़ासाठी कोटीच्या कोटी उड्डाणे सातत्याने घेतली जातात, पण त्याला गतिमान स्वरूप प्राप्त होऊन प्रत्यक्ष कामे सुरू होत नाहीत तोपर्यंत भाविकांच्या अडचणी कायम आहेत. कोल्हापूरची लोकसंख्या सहा लाखांवर पोहोचली आहे. गेली चार दशके हद्दवाढ झाली नसतानाही शहराला पायाभूत नागरी सुविधा पुरवणे महापालिका प्रशासनाला जिकिरीचे बनले आहे. महापालिकेने भक्तनिवास, स्वच्छता, प्रसाधनगृह आदी मूलभूत सुविधा पुरवाव्यात अशी मागणी केली जाते. तथापि या सुविधा सक्षमपणे पुरवण्यात महापालिका, मंदिर व्यवस्थापन अपयशी ठरत असल्याने भाविकांना अडचणींचा सामना करावा लागतो. मंदिर आराखडय़ाचा गोंधळ शहरात सर्वसाधारणत: दिवसाला सुमारे २० हजार भाविक येत असल्याची नोंद देवस्थान समितीत आहे. महालक्ष्मी मंदिर तीर्थक्षेत्र विकासासाठी एकदा १८०० कोटींचा आराखडा बनवला गेला. त्यात बदल होऊन तो थेट १२० कोटींवर आला. आता ४५० कोटींचा आराखडा बनवून त्यातील ७२ कोटींचा पहिला टप्पा राबवण्याचे घाटत आहे. आराखडय़ाचा खेळखंडोबा चालायचा तो चालू दे, पण भाविकांना विविध सोयी-सुविधा मिळणे अपेक्षित आहे. देवस्थानची श्रीमंती वाढतेय देवस्थान समितीअंतर्गत महालक्ष्मी मंदिराचा समावेश होतो. गेल्या २० वर्षांत भाविकांचा ओढा वाढत असल्याने मंदिराच्या तिजोरीत भर पडू लागली आहे. सध्या दर वर्षी १२ कोटी रुपये देणगी रूपाने जमा होत असून त्यात ५ टक्के वाढ होते. जमीन, दागिने व अन्य मालमत्ता मोठी असून त्याच्या मूल्यांकनाचे काम विशेष तपास पथकाकडून सुरू आहे. बंदिजनांकडून भक्तांना लाडू प्रसाद देण्याचे वेगळेपण देवस्थान समितीने जपले आहे. हुंडीत टाकलेल्या दानाच्या पशांचा विनियोग देवस्थानाच्या स्वच्छतेबरोबरच समाजातील गोरगरिबांच्या सेवेकरिता होणार असेल तर भक्तांना दान टाकण्यात आनंद वाटेल, अशा प्रतिक्रिया भक्तांकडून ऐकायला मिळतात. महापालिका उदासीन कचरा संकलन, वाहन तळ याच्या नियोजनापलीकडे महापालिका सुविधा देत नाही. देवी प्रदक्षिणा मार्गावर आजही खड्डे आहेत. विकास आराखडा राबवताना महापालिका व देवस्थान समिती यांच्यातील समन्वयाची कसोटी लागेल, असे नगरसेवक व श्रीपूजक अजित ठाणेकर यांनी सांगितले.
