कोल्हापूर : सिंधुदुर्ग जिल्ह्यात उद्योगपती गौतम अडाणी समूहाच्यावतीने सुरू होणाऱ्या जलविद्युत प्रकल्पाला पाटगाव धरणातून पाणी देण्यात येऊ नये, या मागणीसाठी बुधवारी गारगोटी येथे तहसील कार्यालयासमोर आंदोलन करण्यात आले. यामध्ये भाजपा, शिवसेनेचे दोन्ही गट, राष्ट्रवादी काँग्रेस आदी पक्षाच्या स्थानिक नेत्यांचा व कार्यकर्त्यांचा समावेश होता.
सिंधुदुर्ग जिल्ह्यात उद्योगपती गौतम अडाणी यांचा २१०० मेगाव्हॅट क्षमतेचा वीज निर्मिती प्रकल्प प्रस्तावित आहे. त्याला भुदरगड तालुक्यातील पाटगाव गावातील नागरिकांनी पाणी देण्यास विरोध केला आहे. पाटगाव धरण पाणी बचाव कृती समितीच्या वतीने गारगोटी येथील तहसीलदार कार्यालयासमोर ठिय्या आंदोलनाला सुरूवात केली आहे.
हेही वाचा – मराठा आरक्षण: मनोज जरांगेंच्या अल्टीमेटमवर एकनाथ शिंदेंची जाहीर विनंती, म्हणाले…
यासाठी १४० हेक्टर क्षेत्राचे भूसंपादन झाले असून त्यापैकी ७० हेक्टर क्षेत्रात जलसाठा करण्यात येणार आहे. यासाठी अंजीवडे गावाच्या माथ्यावर असलेल्या कोल्हापूर जिल्ह्यातील भुदरगड तालुक्यातील पाटगाव धरणातून टनेल सदृश पाइपलाइनद्वारे पाणी अंजिवडे येथे उभारल्या जाणाऱ्या जलसाठ्यात सोडले जाणार आहे. मात्र याला पाटगावमधील शेतकऱ्यांनी विरोध केला आहे. पाटगाव धरण क्षेत्रामध्ये अनेक गावे असून पिण्याच्या पाण्यापासून ते शेतीच्या पाण्यापर्यंत या धरणातील पाण्याचा उपयोग या गावातील नागरिक करतात. मात्र, गावकऱ्यांना कुठल्याही प्रकारची माहिती न देता आणि विश्वासात न घेता या प्रकल्पाला केंद्र सरकारने मान्यता कशी दिली? राज्य सरकारने याबाबतची आपली भूमिका केंद्राकडे मांडली त्यावेळी भुदरगडमधल्या लोकप्रतिनिधींना याची कल्पना होती की नव्हती अशी विचारणा यावेळी आंदोलकांनी केली.
हेही वाचा – सोलापूर : एसटी बसमध्ये राहिलेली पाच लाख ऐवजाची पिशवी महिला प्रवाशाला परत
आंदोलनात गावकऱ्यांसह भाजपाचे जिल्हाध्यक्ष राहुल देसाई, आमदार प्रकाश आबिटकर यांचे बंधू अर्जुन आबिटकर, पालकमंत्री हसन मुश्रीफ यांच्या वतीने माजी आमदार के. पी. पाटील यांनी आंदोलनामध्ये सहभाग घेतला. यावेळी पाटगाव धरण पाणी बचाव कृती समितीच्या वतीने या आंदोलनात जिल्ह्यातील आमदार, खासदार आणि पालकमंत्री स्वतः सहभागी होऊन त्यांचा या प्रकल्पाला पाठिंबा आहे का नाही आपली भूमिका स्पष्ट करावी. अशी मागणी ठाकरे गटाचे प्रकाश पाटील यांनी केली. तर सरकारने या प्रकल्पासंदर्भात ठोस निर्णय नाही घेतला टोकाची लढाई करू, पण पाडगाव धरणातील एक थेंबही पाणी या प्रकल्पाला देणार नाही, अशी भूमिका कृती समितीने मांडली आहे.
