कोल्हापूर : उद्धव ठाकरे शिवसेनेचे माजी जिल्हाप्रमुख मुरलीधर जाधव यांनी गुरुवारी पक्षाला ‘जय महाराष्ट्र’ केला. आपली भूमिका दोन दिवसात स्पष्ट करू असे त्यांनी सांगितले. तथापि, मुख्यमंत्री एकनाथ शिंदे यांच्या उपस्थितीत त्यांचा शिंदे सेनेमध्ये दोन दिवसात प्रवेश होणार असे संकेत मिळत आहेत.
जानेवारी महिन्यामध्ये कोल्हापूर जिल्हा ठाकरे सेनेचे जिल्हा प्रमुख मुरलीधर जाधव यांना पदावरून हटवण्याचा निर्णय घेतला होता. या पदावर अठरा वर्षे राहिलेले जाधव यांना हा धक्का होता. जानेवारीच्या पहिल्या आठवड्यात पत्रकार परिषद घेत जाधव यांनी सुषमा अंधारे, हातकणंगलेचे माजी आमदार डॉ. सुजित मिणचेकर, संपर्क प्रमुख अरुण दुधवडकर यांनी राजकीय डावपेच रचले. त्याचा परिणाम म्हणून मला उद्धव बाळासाहेब ठाकरे शिवसेनेच्या कोल्हापूर जिल्हा अध्यक्ष पदावरून कमी केले, असा आरोप केला होता.
हेही वाचा – कोल्हापुरात सराफांना दणका; बंगाली कारागिराने दीड किलो सोने लांबवले
ठाकरेसेनेने डावलले
यानंतर जवळपास दीड महिना झाला तरी पक्षाने जाधव यांची कोणतीही चौकशी केली नाही. तर जाधव हेसुद्धा पक्षापासून फटकून राहिले होते. आदित्य युवा सेनेचे नेते आदित्य ठाकरे यांची पंधरा दिवसापूर्वी हुपरी या जाधव यांच्या शहरांमध्ये सभा झाली होती. तेव्हाही जाधव अनुपस्थित राहिले होते.
फुटिरांविरोधात आक्रमक
शिवसेनेमध्ये फूट पडून एकनाथ शिंदे यांनी सवतासुभा केला होता. तेव्हा मुरलीधर जाधव हे आक्रमक झाले होते. त्यांनी जिल्ह्यातून फुटून शिवसेनेमध्ये गेलेले खासदार संजय मंडलिक, खासदार धैर्यशील माने, आमदार राजेंद्र पाटील, आमदार प्रकाश आबिटकर यांच्या विरोधात मोहीम उघडून गद्दरांना धडा शिकवला पाहिजे, अशी भूमिका घेवून आंदोलने केली होती. आता मात्र त्यांनी ठाकरे सेनेच्या प्राथमिक सदस्यत्वाचा राजीनामा दिला आहे. ते शिंदे सेनेमध्ये सहभागी होण्याच्या प्रक्रियेत दिसत आहेत.
हेही वाचा – कोल्हापुरात सराफांना दणका; बंगाली कारागिराने दीड किलो सोने लांबवले
ठाकरेसेनेला धक्का
दरम्यान, जाधव यांचीही भूमिका ठाकरे सेनेला धक्का देणारी आहे. यानिमित्ताने ठाकरे सेनेचे पहिला जिल्हाप्रमुख शिंदे सेनेमध्ये सहभागी होताना दिसत आहेत.
