निवडणूक आयोगाने शिवसेना हे पक्षनाव तसेच धनुष्यबाण चिन्ह शिंदे गटाला देण्याचा निर्णय दिला होता. या निर्णयावर आक्षेप घेत खासदार संजय राऊत यांनी निवडणूक आयोग, शिंदे गट तसेच भाजपावर गंभीर आरोप केले होते. शिवसेना पक्षनाव आणि चिन्हासाठी २ हजार कोटींचा व्यवहार झाला, असा दावा त्यांनी केला. दरम्यान, याबाबत शिंदे गटाचे नेते उदय सामंत यांनी प्रतिक्रिया दिली आहे. संजय राऊतांच्या आरोपाकडे आम्ही मनोरंजन म्हणून बघतो, अशी खोचक टीका त्यांनी केली. ते कोल्हापूरमध्ये पत्रकारांशी बोलता होते.
काय म्हणाले उदय सामंत?
संजय राऊत रोज सकाळी आरोप करतात. त्यामुळे आम्ही त्यांच्याकडे लक्ष देत नाही. आम्ही त्यांच्या आरोपाकडे मनोरंजन म्हणून बघतो, अशी खोचक टीका उदय सामंत यांनी केला. तसेच काल शिवसेनेच्या कार्यकारिणीची बैठक झाली. या बैठकीत शिवसेनेची शिस्तभंग समिती स्थापन करण्यात आली आहे. त्याचे नेतृत्व मंत्री दादा भुसे करत आहेत. जर कोणी पक्षाच्या विरोधात कारवाई केली, तर ते प्रकरण शिस्तभंग समितीकडे जाईल, असा सुचक इशाराही त्यांनी दिला.
हेही वाचा – पक्ष किती महत्त्वाचा? सिंघवींनी सर्वोच्च न्यायालयात दिलं लोकपाल विधेयकाचं उदाहरण, म्हणाले…
महाविकास आघाडीमधील शिवसेना आणि आताची शिवसेना वेगळी आहे. यामध्ये निवडणूक आयोगानेच बदल केले आहेत. त्यांनी आम्हाला चिन्ह आणि नाव दिलं आहे. आता एकच शिवसेना आहे आणि आमची युती भाजपाबरोबर युती आहे, असेही ते म्हणाले.
हेही वाचा – “वहिनींनी कळत-नकळत…”, शिवसेना फुटण्याचे कारण सांगतांना भरत गोगावले यांनी केला खळबळजनक आरोप
दरम्यान, स्वाभिमानी शेतकरी संघटनेकडून राज्यव्यापी चक्काजाम आंदोलन करण्यात येणार आहे. यावरून सामंत यांनी राजू शेट्टी यांनाही टोला लगावला. एकनाथ शिंदे यांच्याकडे मोठमोठ्या नेत्यांचा येण्याचा ओघ वाढला आहे. आपण त्या नेत्यांमध्ये नाही, हे दाखवण्यासाठी आणि सरकारला बदनाम करण्यासाठी त्यांना अशी आंदोलनही करावी लागत आहेत, असे ते म्हणाले.
