कोल्हापुरात पुराची तीव्रता वाढणार का ? पुन्हा मुसळधारचा इशारा

पंचगंगा, कृष्णा, वारणा, दूधगंगा, वेदगंगा, ताम्रपर्णी या नद्यांचा पूर कायम आहे. तो ओसरण्याचे प्रमाण कमी आहे. पंचगंगा नदीमध्ये ४४ फूट ४ इंच पातळी असून ती धोका पातळीपेक्षा सव्वा फूट अधिक आहे. काल ती ४५ फूट ८ इंच होती. यावरून पाणी किती संथपणे कमी होत आहे याचा अंदाज येतो.शहरातील पुराचे पाणी काही प्रमाणामध्ये कमी होत चालले आहे. स्थलांतरित नागरिक घरी परतू लागले आहेत. ग्रामीण भागात पुराची तीव्रता अजून जाणवत आहे. घरे, शेती पाण्याखाली गेल्याची चिंता आहे. पुढील चार दिवसांमध्ये जिल्ह्यात मध्यम ते मुसळधार स्वरूपाचा पाऊस पडणार असल्याची शक्यता वर्तवली आहे.