काही व्यक्तींचे मन स्थिर राहत नाही. सतत नवीन काही तरी करण्याची किंवा शिकण्याची वृत्ती त्यांना स्वस्थ बसू देत नाही; पण स्वत:चा शोध घेण्याच्या त्यांच्या याच वृत्तीतून अनेक पैलू उलगडत जातात. हरयाणातील सोळा वर्षीय मनू भाकेर अशीच वृत्ती जोपासणारी, नव्याच्या शोधात धडपडणारी. तिला खेळाची भारी हौस म्हणून खेळांच्या बाबतीतच तिने अनेक प्रयोग केले. बॉक्सिंग, क्रिकेट, कबड्डी, टेनिस, मार्शल आर्ट, कराटे इत्यादी बऱ्याच खेळांचे नैपुण्य तिने आत्मसात केले; पण तिचे मन तिला सतत नवीन काही करण्यासाठी साद घाले. या सर्व प्रयोगांत तिने प्रत्येक खेळात पदकांची कमाईसुद्धा केली, तरीही तिला एक वेगळी वाट खुणावत होती. बरोबर दोन वर्षांपूर्वी तिला ती गवसली. एप्रिल २०१६ मध्ये शाळेतील एका स्पर्धेत हौसेखातर तिने नेमबाजीत नेम अजमावला आणि २०१८ मध्ये ती विश्वचषक स्पर्धेत सुवर्णपदक जिंकणारी सर्वात युवा भारतीय नेमबाज ठरली. हरयाणाच्या मनूचा हा प्रवास थोडा संभ्रमात टाकणारा आहे, पण विश्वचषक स्पर्धेतील यशाने तिने भारतीयांच्या आशा उंचावल्या आहेतच, शिवाय स्वत:मधला खेळाडूही तिला शोधण्यात यश मिळाले आहे. मेक्सिको येथे सुरू असलेल्या विश्वचषक नेमबाजी स्पर्धेत मनूने १० मीटर एअर पिस्तूल वैयक्तिक आणि मिश्र सांघिक गटात सुवर्णपदक जिंकले आहे.
हजारपेक्षा जास्त प्रीमियम लेखांचा आस्वाद घ्या ई-पेपर अर्काइव्हचा पूर्ण अॅक्सेस कार्यक्रमांमध्ये निवडक सदस्यांना सहभागी होण्याची संधी ई-पेपर डाउनलोड करण्याची सुविधा
