चेंडूचा फटका लागून १७ वर्षीय खेळाडूचा मृत्यू

ढाका शहरातील बलुर मठ परिसरात रफिक आपल्या मित्रांसोबत एका क्रिकेट सामन्यात सहभागी झाला होता. या सामन्यात आपला संघ फलंदाजी करत असताना रफिक काहीकाळ पंचांची भूमिका बजावत होता. मात्र यादरम्यान  रफिकच्या छातीत चेंडू आदळल्याने त्याला अस्वस्थ वाटायला लागलं, यानंतर त्याच्या सहकाऱ्यांनी त्याला ढाका मेडिकल कॉलेजमध्ये उपचारांसाठी दाखल केलं, मात्र तोपर्यंत रफिकचा मृत्यू झाला होता.

रफिकचा परिवार हा अतिशय गरीब आहे. त्याचे वडील हे ढाका शहरात रिक्षा चालवायचं काम करतात तर आई घरकाम करते. या घटनेनंतर रफिकच्या आई-वडिलांवर दुःखाचा मोठा डोंगर कोसळला आहे. याआधी ऑस्ट्रेलियाचा खेळाडू फिलीप ह्यूजचा भर सामन्यात चेंडू लागून, उपचारादरम्यान मृत्यू झाला होता. या घटनेनंतर परिसरात हळहळ व्यक्त केली जात आहे.