राष्ट्रकुल टेबल टेनिस अजिंक्यपद स्पर्धा : भारतीयांची विजयी सलामी

भारतीय टेबल टेनिसपटूंनी १९व्या राष्ट्रकुल टेबल टेनिस अजिंक्यपद स्पर्धेच्या एकेरी प्रकारात दमदार सलामी दिली. पुरुषांमध्ये जुबिन कुमार, अचंता शरथ कमाल, सौम्यजित घोष, अँथनी अमलराज यांनी आपापल्या लढती जिंकल्या. महिलांमध्ये मौमा दास, के. शामिनी, मधुरिका आणि नेहा अगरवाल यांनी सलामीच्या लढती जिंकत दुसरी फेरी गाठली.
जुबिनने सिंगापूरच्या लिआंग मावर ४-३ अशी मात केली. अव्वल मानांकित लिआंगविरुद्ध खेळताना जुबिनने पहिला गेम ११-७ असा सहजतेने जिंकला. सहाव्या गेममध्ये जुबिनकडे ३-२ अशी आघाडी होती. बॅकहँडचा प्रभावी फटक्यासह जुबिनने ७-४ अशी आघाडी घेतली. मात्र लिआंगने आपला खेळ उंचावत जुबिनला चुका करण्यास भाग पाडले आणि गेम १३-११ असा जिंकला. अंतिम आणि निर्णायक गेममध्ये लिआंग थकल्यासारखा जाणवत होता. त्याच्या भरकटलेल्या फटक्यांचा फायदा उठवत जुबिनने या गेमसह ११-६ सामना जिंकला. मिश्र दुहेरी प्रकारात मौमा दास आणि सौम्यजित घोष जोडीने उपांत्य फेरीत प्रवेश केला.